Яллиғланган милклар қандли диабет, оғизнинг қуруши эса тирнаш хусусияти берувчи ичак синдроми белгиси бўлиши мумкин. Бу ҳақда Сиднейнинг етакчи стоматологи доктор Майкл Цай маълум қилди.

Мутахассиснинг таъкидлашича, милкларнинг ҳолати диабетга мойиллик кўрсаткичи бўлиб хизмат қилиши мумкин. Қондаги қанд миқдори нормал бўлмаса, милк кўпинча яллиғланади, юмшоқ бўлиб қолади ва қон кетади. Бундай ҳолларда стоматологлар диабет учун текширувдан ўтишни маслаҳат беришади.

Инсоннинг қандай нафас олишига ҳам алоҳида эътибор берилиши керак - бурун ёки оғиз орқали. Оғиз орқали нафас олиш уйқу апноэси синдромини кўрсатиши мумкин, бу уйқу пайтида нафас қисқа вақт тўхтаганда пайдо бўлади. Бундай касалликка чалинган беморлар кўпинча тишларини ғижирлатиш ва милк касаллигидан азият чекишади.

Баъзи аутоиммун касалликлар, масалан, тирнаш хусусиятини берувчи ичак синдроми ёки склероз оғизнинг қаттиқ қурушига олиб келиши мумкин. Оғиздаги қизил яралар Крон касаллиги ёки қизил югурик (волчанка) каби касалликларнинг белгиси бўлиши мумкин.

Цайнинг қўшимча қилишича, стоматологлар беморнинг овқатланиш одатларини ҳам аниқлашлари керак. Қизил шароб ва қаҳва ичувчиларнинг тишларида кўпинча характерли доғлар бўлади ва шакарни кўп истеъмол қилиш кариесга олиб келиши мумкин. Рациондаги кислотали овқатлар кўпинча тиш эмалининг юпқалашишига олиб келади.

Тилнинг ҳолатига алоҳида эътибор берилиши керак. Тилдаги оқ доғлар ёмон гигиена, чекиш ёки ортиқча спиртли ичимликларни истеъмол қилишни кўрсатиши мумкин. Aгар бундай доғлар бир ҳафталик эҳтиёткорлик билан гигиеник даволанишдан кейин йўқолмаса, қўшимча текширув учун шифокор билан маслаҳатлашиш тавсия этилади.