“Dori vositalari va tibbiy jihozlar muomalasini tartibga solishga doir qoʼshimcha chora-tadbirlar toʼgʼrisida”gi Prezident Farmoni (PF–137-son, 19.08.2025 y.) qabul qilindi.

Farmonga koʼra, 2026 yil 1 yanvardan tibbiy buyumlar va tibbiy texnikalarning muomalasi quyidagicha tartibda amalga oshiriladi:

- tibbiy buyum va tibbiy texnikalar tibbiy jihozlar sifatida davlat roʼyxatidan oʼtkaziladi;

- tibbiy jihozlar inson hayoti bilan bogʼliq boʼlgan ehtimoli yuqori xavflarni hisobga olgan holda 4 ta xavfsizlik darajasiga koʼra tasniflanadi;

- tibbiy jihozlar klinik tadqiqotlarning ijobiy natijasi asosida davlat roʼyxatidan oʼtkaziladi.

✅ Shuningdek, dori vositalari va tibbiy jihozlar uchun muvofiqlik sertifikatini rasmiylashtirishda quyidagilar talab qilinadi:

▪️ dori vositalari uchun – 2027 yil 1 yanvardan ishlab chiqaruvchining dori vositalari turiga “Zarur ishlab chiqarish amaliyoti – GMP” milliy sertifikati;

▪️ tibbiy jihozlar uchun – 2027 yil 1 iyuldan ishlab chiqaruvchining “ISO: 13485” milliy standartiga muvofiqlik sertifikati.

Farmonga koʼra, 2026 yil 1 yanvardan:

➖ mahalliy va xorijiy ishlab chiqaruvchilar dori vositalarini davlat roʼyxatidan oʼtkazish va roʼyxatdan oʼtkazilganlik guvohnomasining amal qilish muddatini uzaytirish uchun “Zarur ishlab chiqarish amaliyoti – GMP” milliy sertifikatiga ega boʼlishi talab etiladi;

➖ dori vositalari va tibbiy jihozlarni davlat roʼyxatidan oʼtkazish natijalariga koʼra mahalliy va xorijiy ishlab chiqaruvchilarga amal qilish muddati 5 yil boʼlgan roʼyxatdan oʼtkazilganlik guvohnomasi beriladi.

Bunda mahalliy ishlab chiqaruvchilarga ilgari muddatsiz berilgan roʼyxatdan oʼtkazilganlik guvohnomalarining amal qilish muddati mazkur Farmon kuchga kirgan sanadan eʼtiboran 5 yil etib belgilanadi;

???? dori vositalari va tibbiy jihozlarni ishlab chiqarish ularning huquq egasining buyurtmasi asosida tegishli litsenziyaga ega boʼlgan ishlab chiqaruvchilar tomonidan shartnoma orqali amalga oshirilishi mumkin;

???? tibbiy jihozlarni chakana realizatsiya qilish faoliyati uchun litsenziya talabi bekor qilinib, ushbu faoliyat vakolatli organni xabardor qilish orqali amalga oshiriladi.