Sogʻliqni saqlash vazirining “Dori vositalarining asosiy farmakologik koʻrsatkichlarini oʻz ichiga oluvchi klassifikatorlarni tasdiqlash toʻgʻrisida”gi buyrugʻi davlat roʻyxatidan oʻtkazildi. Bu haqda Adliya vazirligi xabar qildi.

Ushbu hujjat Oʻzbekiston Respublikasi Prezidentining 2025-yil 19-avgustdagi PF–137-son Farmoni ijrosini taʼminlash maqsadida qabul qilingan.

Hujjatga asosan klassifikatorlar 4 yoʻnalishga ajratilgan:

1️⃣ Dori shakllari boʻyicha klassifikator
– Dori moddasining agregat holati (qattiq, suyuq, gazsimon va b.);
– Dori shakli (tabletka, eritma, kapsula, gel va b.);
– Toʻliq texnologik shakli (masalan, milkka surtish uchun gel, dorivor shampun).

2️⃣ Anatomo-terapevtik va kimyoviy xususiyatlari boʻyicha klassifikator
– Anatomik tizim (masalan, nerv tizimi);
– Terapevtik guruh (psixotrop vositalar);
– Farmakologik va kimyoviy guruh nomlari.

3️⃣ Dori vositalarini organizmga yuborish usullari boʻyicha klassifikator
– Dori vositasini yuborishning 83 ta usuli (masalan: til ostiga, quloq orqali, bachadon ichiga).

4️⃣ Xalqaro patentlanmagan nomlar boʻyicha klassifikator
– 9 mingdan ortiq dori moddalarining xalqaro miqyosda tan olingan haqiqiy nomlari (masalan: paratsetamol, ibuprofen, amoksitsillin).

Mazkur klassifikatorlar dori vositalarining yagona tartibda roʻyxatdan oʻtkazilishi, farmatsevtika sohasida aniqlik va tizimlilikni taʼminlashga xizmat qiladi.