London Universitet kolleji tadqiqotchilari Kembrij universiteti va London Imperial kolleji mutaxassislari bilan birgalikda ultra-qayta ishlangan oziq-ovqatlarni (UPF) isteʼmol qilish va 2-tip diabet rivojlanish xavfi oʻrtasidagi bogʻliqlikni aniqladilar. Ilmiy ish natijalari The Lancet Regional Health-Europe jurnalida chop etildi.

Tadqiqotda olimlar oziq-ovqatning qayta ishlanish darajasi va uning sogʻlikka taʼsirini oʻrganib chiqdi. Tayyor ovqatlar, gazaklar, shirinliklar va ichimliklarni oʻz ichiga olgan ultra-qayta ishlangan oziq-ovqatlarga (UPF) alohida eʼtibor qaratildi. Tadqiqotchilar ratsionda UPF ulushini 10 foizga oshirish 2-tip qandli diabet rivojlanish xavfini 17 foizga oshirishini aniqladi.

Tahlil Yevropaning 8 ta davlatidan 311 892 ishtirokchining maʼlumotlarini oʻz ichiga olgan, ular oʻrtacha 11 yil davomida kuzatilgan. Ushbu davr mobaynida 14236 kishi 2-tip qandli diabet bilan kasallangan. Tadqiqot shuni koʻrsatdiki,  qayta ishlangan oziq-ovqatlarni kamroq qayta ishlangan ovqatlar bilan almashtirish kasallik xavfini kamaytiradi.

Sogʻliq uchun eng xavfli boʻlgan oziq-ovqat guruhlari orasida achchiq gazaklar, qayta ishlangan goʻshtlar, tayyor ovqatlar, sunʼiy va shirin ichimliklar kiradi. Tahlil shuni koʻrsatdiki, bu mahsulotlar diabet rivojlanishiga juda katta hissa qoʻshadi.

Tadqiqot mahsulotlarni qayta ishlash darajasiga koʻra toʻrt toifaga ajratadigan Nova tasniflash tizimiga asoslandi. Bu tadqiqotchilarga turli xil UPF ning sogʻliqqa taʼsirini aniq baholash va eng katta xavf tugʻdiradigan guruhlarni aniqlash imkonini berdi.

Tadqiqot mualliflari ultra-qayta ishlangan oziq-ovqat isteʼmolini kamaytirish va ularni kamroq qayta ishlangan ovqatlar bilan almashtirish 2-tip diabet rivojlanish xavfini sezilarli darajada kamaytirishi mumkin degan xulosaga kelishdi.