Olimlar emlashning g‘ayrioddiy usulini - oddiy tish ipidan foydalanishni taklif etishdi.

Nature Nanotechnology (Nat Nanotechnol) jurnalida e’lon qilingan tadqiqot shuni ko‘rsatdiki, tish bilan milk orasidagi tabiiy o‘tkazuvchan soha - milk egatchasi orqali emlash preparatlarini yuborish mahalliy va tizimli darajada kuchli immunitet javobini yuzaga keltirishi mumkin.

Sichqonlarda o‘tkazilgan tajribalarda gripp virusi oqsillarini o‘z ichiga olgan nanozarrachalar bilan ishlov berilgan ip limfa tugunlari faoliyatini kuchaytirdi, o‘pka, taloq va ilik to‘qimalarida CD4+ T hujayralar sonini ko‘paytirdi hamda infeksiyadan barqaror himoyani ta’minlaydigan antitanalar ishlab chiqarilishini rag‘batlantirdi.

An’anaviy usullardan farqli o‘laroq, bu usul burun orqali emlash bilan taqqoslanadigan darajada kuchliroq va uzoqroq davom etadigan immunitet reaksiyasini namoyon etdi.

Usul yoshdan, ovqatlanish yoki suv ichishdan qat’i nazar samarali bo‘lib, inyeksiyalarni talab qilmagani sababli, uni ommaviy immunizatsiya uchun istiqbolli muqobil usul sifatida ko‘rsatdi. Bundan tashqari, tadqiqotchilar bu yondashuvni odamlarda ham sinab ko‘rishdi: flyuoressent bo‘yoq yordamida tish ipiga surtilgan moddalar haqiqatan ham milk egatiga yetib borishini aniqladilar.

Mualliflarning fikricha, "floss-emlash" infeksiyalardan himoyalanishning qulay va og‘riqsiz usuli bo‘lishi mumkin. Bundan tashqari, u kelajakda vaksinalarni yetkazib berishning yangi platformalari uchun asos vazifasini o‘tashi mumkin.