Urugvaylik olimlar ishtahani pasaytirmasdan va jismoniy zo‘riqishsiz ozishga yordam beradigan noyob SANA tabletkasi klinik sinovlarining birinchi bosqichi yakunlanganini e’lon qildi. Tadqiqot natijalari Nature Metabolism jurnalida chop etilgan.

SANA - kreatin almashinuvining maxsus yo‘lini faollashtirish orqali yog‘ hujayralarini kaloriyalarni yoqishga qayta sozlaydigan dunyodagi birinchi tabletka. Ishtahani pasaytiradigan ma’lum vositalardan farqli o‘laroq, SANA bevosita ichki termogenezni kuchaytiradi - yog‘ hujayralari hatto tinch holatda ham ko‘proq energiya sarf qila boshlaydi.

Sinovda 44 nafar ko‘ngilli qatnashdi. Ikki hafta davomida preparatning yuqori dozalari tana vaznini o‘rtacha uch foizga kamaytirdi, bunda mushak to‘qimalari zararlanmadi, qondagi glyukoza miqdori va insulinga sezuvchanlik ko‘rsatkichlari yaxshilandi. Na jiddiy salbiy ta’sirlar, na ishtahaga ta’sir kuzatildi.

Tabletka Urugvayda uning ixtirochilari tomonidan tashkil etilgan Eolo Pharma startapi tomonidan ishlab chiqilgan. SANA asosiy ferment AGAT bilan kovalent bog‘lanish tamoyiliga asoslanib ishlaydi, bu esa yog‘ hujayralarining faoliyatini uzoq muddatli o‘zgartirishni ta’minlaydi. Keyingi bosqich 2025-yil oxirida boshlanadigan 2-tur qandli diabet bilan og‘rigan bemorlar ishtirokidagi keng ko‘lamli sinovlar bo‘ladi.

Tadqiqotchilar ta’kidlashicha, yangi yondashuv semizlikka qarshi kurashning mavjud usullariga raqobat qilmaydi, aksincha ularni to‘ldiradi va butunlay yangi yo‘nalishni ochadi - ovqat iste’molini cheklash o‘rniga, organizmning energiya sarfini kuchaytirish orqali ta’sir ko‘rsatadi.