Rossiyada saratonning barcha turlariga qarshi vaktsinaning birinchi sinovlari yaxshi natijalarni koʼrsatdi. Rossiya Fanlar akademiyasi akademigi Aleksandr Ginzburg Gazeta.Ru bilan suhbatda shu haqda gapirdi.

Preparatning birinchi sinovi melanoma bilan sunʼiy ravishda emlangan sichqonlarda oʼtkazildi. Shundan soʼng, baʼzi kemiruvchilar yangi vaktsina bilan emlandi. 15-kuni, hayvonlarning immun tizimi ishlay boshlaganida, olimlar emlangan va emlanmagan sichqonlar oʼrtasida oʼsimta oʼlchamida katta farq borligini koʼrdilar.

Vaktsinani olgan kemiruvchilar tirik. 19 va 22 kunlar orasida emlanmaganlari orasida oʼlim qayd etilgan. Ginzburgning qoʼshimcha qilishicha, tajriba hozirda davom etmoqda.

“Haqiqatan ham, onkologiyaning barcha muammolarini tom maʼnoda hal qilish imkonini beradigan universal texnologiya yaratilgan. Bu amaliyotga qanday tatbiq etilishi boshqa masala”, - dedi u.

Olimning qayd etishicha, terapevtik vaktsina COVID-19 ga qarshi dori vositalariga oʼxshash mRNK texnologiyalari asosida yaratilgan. U saraton kasalligiga chalingan odamlarga qoʼllaniladi. Shunisi eʼtiborga loyiqki, vaktsinalar individual boʼladi, yaʼni bemorning oʼziga xos xususiyatlari hisobga olingan holda ishlab chiqiladi. Ginzburgning soʼzlariga koʼra, Rossiyada saraton kasalligiga chalingan bemorlarga vaktsina mushak ichiga yoki toʼgʼridan-toʼgʼri oʼsimtaga kiritilishi, soʼngra preparat butun tanaga teng taqsimlanishi rejalashtirilgan. Shu bilan birga, tomchilar orqali yuborish imkoniyati koʼrib chiqilmaydi, chunki bu jigarga salbiy taʼsir qilishi mumkin.

“Albatta, samaradorlik dorining yuborilish usuliga bogʼliq. Yaqin kunlarda bu savolning javobiga oydinlik kiritamiz”, deb tushuntirdi u.