Гепатит дунёда энг кўп одамлар вафот этадиган юқумли касалликлар орасида иккинчи ўринда туради: у йилига 1,3 миллион инсоннинг ўлимига сабаб бўлади - яъни юқумли касалликлар орасида ўлимнинг асосий сабаби бўлган сил касаллиги билан бир хил ҳисобланади.

Жаҳон соғлиқни сақлаш ташкилотининг 2024 йилги глобал гепатит ҳисоботига кўра ушбу касаллик қурбонлари сони доимий ўсиб бормоқда.

Ўзбекистон Республикаси Президентининг 2022 йил 16 майдаги ПҚ-243-сонли "Айрим долзарб вирусли инфекциялар тарқалишига қарши курашиш чора-чора-тадбирларини такомиллаштириш тўғрисида"ги қарори асосида мамлакат миқёсида кенг кўламли скрининг ва профилактик чора-тадбирлар амалга оширилмоқда.

АОКАда ўтказилган матбуот анжуманида хабар берилишича, жорий йилнинг 14 апрель ҳолатига республикада аҳолининг 1 446 497 нафари (75,1 фоизи) вирусли гепатит “В” турига, 1 446 628 нафари (75,2 фоизи) вирусли гепатит С турига скрининг текширувидан ўтказилган. Скрининг текширувидан ўтказилган аҳолинининг 40 889 нафарида (2,8 фоизи) гепатит В тури, 49 886 нафарида (3,4 фоизи) гепатит С тури аниқланган. Қарорда белгиланганидек, вирусли гепатит С тури билан касалланган беморларни вирусга қарши даволашни 10,5 минг нафаргача етказиш режа қилинган. Вирусли гепатит “В” инфекцияси юқиш хавфи юқори бўлган жами 119 013 минг нафар тиббиёт ходимларини ушбу инфекцияга қарши тўлиқ эмлаш ишлари ўтказилди.

Маълумки, юқумли касалликларни олдини олишда эмлашнинг аҳамияти жуда катта. 27 - апрелдан ўз ишини бошлаган Европа эмлаш ҳафталиги 3-май кунигача давом этади. ЕЭҲ— бу ҳар йили ўтказиладиган ташаббус бўлиб, ЖССТ Европа ва Марказий Осиё минтақавий бюроси ва унга аъзо бўлган бир қатор давлатларда иммунизация бўйича хабардорликни ошириш, коммуникацияни яхшилаш ва эмлашни тарғиб қилишга қаратилган. Ташаббуснинг мақсади — ҳар бир боланинг эмлаш билан олдини олиш мумкин бўлган касалликлардан ҳимояланиш ҳуқуқи ва эҳтиёжи борлигини эслатиш орқали эмлаш қамровини ошириш ва бу борадаги хабардорликни кучайтиришдир.