Витамин К суякларнинг мустаҳкамлиги ва ички тузилиши билан барқарор боғлиқ бўлган ягона витамин бўлиб чиқди.

Австралиялик олимлар шундай хулосага келди. Тадқиқот натижалари Nutrients журналида чоп этилган.

Тадқиқотчилар сон суяги жарроҳлик амалиёти ўтказилган 108 нафар беморнинг маълумотларини ўрганиб, сон суяги синиши бўлган ва бўлмаган беморларни солиштирган. Улар К, D, C ва E, В гуруҳи витаминлари, рух ва бошқа озиқланиш кўрсаткичлари даражасини баҳолаган. Шунингдек, суяк тўқимасининг мустаҳкамлиги ва микротузилиши ҳам батафсил ўрганишган.

Маълум бўлишича, фақат витамин К билан боғлиқ кўрсаткичлар суякларнинг ҳолати билан изчил боғлиқликни намоён қилган. Витамин К таъсирида фаол ҳолатга келадиган оқсил — остеокальциннинг фаол шакли сон суягининг юқори мустаҳкамлиги, кортикал қатламининг қалинроқ бўлиши ва ички тузилишининг зичроқлиги билан боғлиқ бўлган. Аксинча, остеокальциннинг нофаол шакллари суяклар мўртлигининг ортиши белгилари кузатилганлар кўпроқ учраган.

Муаллифлар таъкидлашича, витамин К суяк тўқимасининг тўғри минераллашуви учун зарур. У остеокальциннинг кальцийни боғлаши ва уни суяк таркибига киритишида ёрдам беради.

Бироқ тадқиқот натижалари витамин К қабул қилишнинг ўзи суяк синиши хавфини камайтиради, деган хулосани исботламайди. Яъни, витамин К суяклар саломатлигида муҳим роль ўйнаши мумкин, аммо уни қўшимча равишда қабул қилиш зарурати ва самараси бўйича алоҳида клиник тадқиқотлар талаб этилади.