ФДA 20 йил ичида марказий асаб тизимига таъсир қилмасдан оғриқ сигналларини блоклайдиган биринчи инновацион опиоид бўлмаган аналгетикни тасдиқлади.

Vertex компанияси томонидан ишлаб чиқилган препарат клиник синовларда юқори самарадорликни кўрсатди ва ҳар йили ўн минглаб одамларни қарам қиладиган опиоидларга муқобил бўлиши мумкин.

AҚШ озиқ-овқат ва фармацевтика идораси (ФДA) ўртача ва кучли, ўткир оғриқларни даволаш учун опиоид бўлмаган дори, Journavx (suzetrigin) ни тасдиқлади. Препарат фақат периферик нервларга таъсир қилади ва мия ичкарисига кирмайди, шунинг учун у опиоид оғриқ қолдирувчи воситалардан фарқли ўлароқ, қарамликка олиб келмайди.

Препаратнинг самарадорлиги операция қилинган 1000 га яқин одам иштирок этган иккита тадқиқотнинг III босқичли натижалари билан тасдиқланган. Уларга плацебо, опиоид Vicodin (hydrocodone + acetaminophen) ёки Journavx берилди.

Aбдоминопластикадан сўнг (қорин бўшлиғини эстетик операцияси) Vertex препаратини қабул қилган беморларнинг 61 фоизи оғриқнинг камида 30 фоизга камайганини қайд этди. Плацебо гуруҳида иштирокчиларнинг 48% оғриқни камайгани ҳақида хабар беришди.

Бунионэктомиядан сўнг (оёқ бош бармоғидаги чиқиб кетган суякни тузатиш) Journavx қабул қилган беморларнинг 83 фоизида оғриқ сезиларли даражада камайган. Таққосланадиган аналгетик таъсир плацебо гуруҳидаги беморларнинг 68 фоизида қайд этилган.

Опиоид препарати оғриқни сезиларли даражада камайтирди, аммо у кўпроқ ён таъсирга олиб келди. Биринчи синовда кўнгил айниши ва қусиш Vicodin гуруҳидаги иштирокчиларнинг 33 фоизига ва Journavx гуруҳидагиларнинг 20 фоизига таъсир кўрсатди. Иккинчи тадқиқотда беморларнинг 16% ва 9% мос равишда бир хил салбий реакциялардан шикоят қилдилар.

Препаратни ишлаб чиқиш учун учун йигирма йилдан кўпроқ вақт керак бўлди, деб ёзади New York Times.

Aмерика Қўшма Штатларида ҳар йили 80 миллионга яқин одам оғриқ қолдирувчи воситалар учун рецепт олади ва уларнинг тахминан ярмига опиоид препаратлар буюрилади. Натижада 85 минг беморда дориларга қарамлик юзага келади. Опиоид бўлмаган муқобилнинг пайдо бўлиши наркотик оғриқ қолдирувчи воситалардан фойдаланиш билан боғлиқ хавфларни камайтиради.

Vertex компанияси, шунингдек, унинг периферик нейропатик оғриқларга таъсирини ўрганмоқда, бундан ташқари, ишлаб чиқарувчи лумбосакрал радикулопатия билан оғриган беморлар орасида препаратни ўрганишни ҳам режалаштирган.