Қишлоқ ҳудудларида яшовчилар шаҳар аҳолисига нисбатан саратондан кўпроқ вафот этади ва бу фарқ тобора ортиб бормоқда. Бу хулосага тадқиқотчилар 1969 йилдан 2023 йилгача бўлган даврда қарийб 28 миллион ўлим ҳолатлари ҳақидаги маълумотларни таҳлил қилиш орқали келишган.

Тадқиқот натижалари Journal of the National Cancer Institute журналида эълон қилинган. Ҳозирги вақтда саратондан ўлимнинг энг юқори кўрсаткичлари қишлоқ ҳудудларида қайд этилмоқда, энг паст кўрсаткичлар эса йирик шаҳарларда кузатилмоқда. Ҳолбуки, 1960-йиллар охирида вазият аксинча эди: ўша пайтда айнан катта шаҳар аҳолиси онкологик касалликлардан кўпроқ вафот этарди.

Бу ўзгариш эркакларда 1990-йилларда, аёлларда эса 2000-йиллар бошида яққол намоён бўла бошлади. Масалан, илгарилари қишлоқ жойларда эркаклар ўртасида ўпка саратонидан ўлим кўрсаткичи шаҳарларга нисбатан паст эди, аммо сўнгги йилларда бу 50 фоиздан ҳам кўпроққа ошиб кетди.

Муаллифлар бу фарқни тиббий хизматдан фойдаланиш имкониятларининг тенг эмаслиги билан изоҳлайдилар. Қишлоқ ҳудудларида скрининг текширувлари камроқ ўтказилади, даволаниш имкониятлари чекланган, хавф омиллари юқорироқ, жумладан чекиш кенгроқ тарқалган.

Тадқиқотчилар таъкидлашича, натижалар соғлиқни сақлашдаги тенгсизликнинг ўсиб бораётганини кўрсатади. Диагностика ва даволаш имкониятларини яхшилаш орқали ўлим ҳолатлари камайиши ва қишлоқ ҳамда шаҳар аҳолиси ўртасидаги фарқ қисқариши мумкин.