Қонда магний миқдорининг пастлиги қандли диабетнинг энг кўп учрайдиган асоратларидан бири — диабетик ретинопатияривожланиши билан боғлиқ эканлиги аниқланди. Бу ҳолатда кўзнинг қон томирлари зарарланади.

Бу Саудия Арабистонидаги Қирол Абдул-Азиз университети тадқиқотчилари томонидан эришилган хулоса.  Тадқиқот натижалари Nutrients журналида эълон қилинди. Олимлар 17 та тадқиқот маълумотларини таҳлил қилишди, унда 2200дан ортиқ киши иштирок этган. Натижада, диабетик ретинопатияси бўлган беморларда қонидаги магний миқдори диабетик ретинопатиясиз беморларга нисбатан сезиларли даражада паст эканлиги аниқланди. Шунингдек, бу боғлиқлик тадқиқот ўтказилган ҳудуд ёки ўлчов усулидан қатъий назар сақланиши аниқланди.

Қўшимча таҳлиллар шуни кўрсатдики, магний етишмовчилиги диабетик ретинопатиянинг оғирроқ — пролифератив шаклида кўпроқ номоён бўлади. Бу магний даражаси нафақат касаллик пайдо бўлиш хавфи билан, балки унинг ривожланиши билан ҳам боғлиқлигини кўрсатади.

Тадқиқотчилар таъкидлашича, магний инсулин ишлаши, энергия алмашинуви ва қон томирларини ҳимоя қилишда муҳим аҳамиятга эга. Унинг етишмаслиги оксидловчи стрессни, яллиғланишни ва кўзнинг тўр пардаси томирларига зарар етказишни кучайтириши ва охир-оқибат асоратлар ривожланишига ҳисса қўшиши мумкин.

Тадқиқот муаллифларининг фикрига кўра, магний даражаси диабетик ретинопатия учун потенциал хавф белгиси деб ҳисобланиши мумкин. Уларнинг фикрича, кейинги тадқиқотлар магний етишмовчилигини тузатиш диабет билан оғриган беморларда ушбу асоратни ривожланиш эҳтимолини камайтириши мумкинлигини тушунишга ёрдам беради.