2021-йилда дунёда ҳомиладорлик ва туғиш даврида ўлимнинг кескин ўсиши кузатилди - ўшанда COVID-19 пандемияси авж олган даврда 322 минг аёл асоратлардан вафот этди - бу 2020-йилга нисбатан 40 мингга кўп.

Бу маълумотлар БМТ томонидан эълон қилинган ва оналар ўлими бўйича биринчи глобал ҳисоботни тақдим этган ҳисоботда келтирилган.

Оналар ўлимининг кўпайиши нафақат COVID-19 туфайли юзага келган тўғридан-тўғри асоратлар, балки оналикни муҳофаза қилиш хизматларини кўрсатишда кенг тарқалган узилишлар билан ҳам боғлиқ. "Бу пандемиялар ва бошқа фавқулодда вазиятлар пайтида ҳомиладор аёллар режали хизматлар ҳамда текширувлардан, шунингдек, кеча-ю кундуз шошилинч тиббий ёрдамдан ишончли фойдаланишлари кераклиги ва бундай парваришни таъминлаш муҳимлигини кўрсатади," - дейилади БМТ ҳисоботида.

Жорж Вашингтон университети Жамоат саломатлиги мактаби олимлари ҳомиладорлик даврида COVID-19 га чалиниш она ва ҳомилада асоратлар хавфини сезиларли даражада оширишини аниқлади. Оналар ўлими хавфи 7,7 баравар, интенсив терапия бўлимига ётқизиш 3,8 баравар, ўпканинг сунъий вентиляциясига бўлган эҳтиёжи 15 баравар ошди. Шунингдек, пневмония ривожланиш хавфи 23 баравар ва тромбоэмболия ривожланиш хавфи 5,5 баравар юқори бўлган.

Коронавирус инфекцияси билан касалланган аёллардан туғилган болалар неонатал ёрдам бўлимига кўпроқ ётқизилган. Бундан ташқари, кам вазн ва эрта туғилиш хавфи уч баравар юқори бўлиб чиқди. Ўлик туғилиш ёки ҳомила ривожланишининг кечикиши эҳтимоли ошмади.

БМТ таъкидлашича," соғлиқни сақлаш хизматларини молиялаштиришнинг глобал қисқариши кўпроқ ҳомиладор аёлларни хавф остига қўяди", шунинг учун дунё ҳар бир она ва боланинг омон қолиши ҳамда ривожланиши учун зудлик билан доялар, ҳамширалар ва жамоат соғлиқни сақлаш ходимларига сармоя киритиши керак.

БМТ ҳисоб-китобларига кўра, 2000-йилдан 2023-йилгача оналар ўлими 40 фоизга камайди - бу асосан асосий тиббий хизматлардан фойдаланиш имкониятининг яхшиланиши билан боғлиқ. Шу билан бирга, яхшиланиш суръатлари 2016-йилдан бери сезиларли даражада секинлашгани ва 2023-йилда тахминан 260 минг аёл ҳомиладорлик ёки туғруқ асоратлари натижасида вафот этгани, бу тахминан ҳар икки дақиқада битта она ўлимига тенг эканлиги қайд этилган.