AҚШ озиқ-овқат маҳсулотлари ва дори воситалари сифатини назорат қилиш бошқармаси (ФДA) қандолат маҳсулотлари ва перорал (оғиз орқали қабул қилинадиган) дори воситаларини ишлаб чиқаришда №3 синтетик озиқ-овқат бўёғидан фойдаланишни тақиқлади. Лаборатория каламушларида ўтказилган тадқиқотлар натижаларига кўра бўёқ канцероген хусусиятга эга.

Ўттиз йил аввал пардоз-андоз воситаларини ишлаб чиқаришда ушбу буёқдан фойдаланишга тақиқ киритилган эди.

Бир неча йиллардан бери истеъмолчилар ҳуқуқларини ҳимоя қилувчи турли ташкилотлар уни тақиқлашни талаб қилиб келмоқда. 2022-йилда ранг берувчи модданинг юқори консентрацияси эркак каламушларда саратон касаллигини қўзғатишини тасдиқловчи тадқиқот натижаларини ўрганиш талаби билан петиция берилган.

"ФДA одамлар ёки ҳайвонларда онкологик касалликларни келтириб чиқариши мумкин бўлган озиқ-овқат қўшимчалари ва бўёқлардан фойдаланишга рухсат бермаслиги керак," - деди инсон учун озиқ-овқат бўйича вакил ўринбосари Жим Жонс.

Бироқ, регуляторнинг таъкидлашича, ҳайвонлар ва одамларда ўтказилган бошқа тадқиқотлар бундай таъсирни аниқламаган ва мавжуд маълумотлар бўёқдан озиқ-овқат маҳсулотлари ва перорал дори воситаларида фойдаланиш инсон саломатлиги учун хавф туғдиришини тасдиқламайди.

Маҳсулотларини тайёрлашда қизил №3 дан фойдаланадиган озиқ-овқат ишлаб чиқарувчилари 2027-йил 15-январгача тайёрлаш рецептини ўзгартириши керак. Фармацевтика компаниялари учун тегишли муддат 2028-йил 18-январга белгиланган.