Tez yurish aritmiya xavfini kamaytiradi
Shotlandiya olimlarining yangi tadqiqoti yurak aritmiyasidan himoyalanishning oddiy usulini taklif qiladi: ko‘proq yurish.
Aritmiya deb ataladigan yurak ritmining buzilishi yurak-qon tomir kasalliklari, nogironlik va o‘limga sezilarli hissa qo‘shadi. Aritmiyaning bir necha turlari mavjud, jumladan taxikardiya, bradikardiya va atriyal fibrilatsiya.
Mutaxassislar har qanday turdagi aritmiya belgilari bo‘lmagan 420 000 dan ortiq ishtirokchilarni (o‘rtacha yoshi - 55 yosh) tanlab olishdi, ular yurish tezligi haqida ma’lumot berishdi. Yurish davomiyligi va tezligi haqidagi ma’lumotlar 82 000 ga yaqin odamda mavjud edi
Tadqiqotchilar yurish tezligini quyidagicha aniqladilar:
Sekin: taxminan 4,8 km/soat.
Barqaror (o‘rtacha): 4,8–6,4 km/soat.
Tez: 6,4 km/soatdan yuqori.
Ishtirokchilarning 6,5 foizi sekin yurishni, 50 foizdan ortig‘i o‘rtacha tezlikda va taxminan 40 foizi tez yurishni mashq qildi.
13-yillik kuzatuv davomida 10 ishtirokchidan 1 nafaridan yurak ritmi buzilishlari qayd etildi. Keyingi tahlillar shuni ko‘rsatdiki, tez yurganlarda sekin yurganlarga nisbatan aritmiya rivojlanish xavfi 43% ga, xususan atriyal fibrilatsiya 46% ga past bo‘lgan. (Taqqoslash uchun, o‘rtacha tezlikda yurganlarda aritmiya rivojlanish xavfi 35% ga past bo‘lgan).
Tez yurganlarning tanadagi yallig‘lanish darajasi ham past bo‘lgan, bu past C-reaktiv oqsil darajasida aks etgan.
"Jismoniy faollik anomal yurak ritmi buzilishi va boshqa yurak-qon tomir kasalliklari xavfini kamaytirishi ma’lum. Sekin yurish sog‘liq uchun harakatsiz turmush tarzidan ko‘ra yaxshiroqdir, ammo yangi tadqiqot shuni ko‘rsatdiki, yurishning tezligi yurakni qo‘shimcha himoya qiladi", - deydi tadqiqot mualliflari.
