Quyosh yorug‘lik beradi va inson salomatligi uchun zarur - quyosh nurlari tarkibida D vitamini mavjud bo‘lib, u suyak va tish salomatligi uchun zarur bo‘lgan kalsiy va fosfor almashinuvida muhim rol o‘ynaydi.

Biroq, shu bilan birga, ultrabinafsha nurlanishning uzoq muddatli ta’siri jiddiy kasalliklarning rivojlanish xavfini oshirishi mumkin, deb ogohlantirdi oftalmologiya bo‘limi mudiri Shahlo Mahkamova.

Avvalo, mutaxassisning so‘zlariga ko‘ra, yorqin quyosh ko‘z uchun xavfli. Ultrabinafsha nurlarning ortiqcha miqdori ko‘zni himoya qiluvchi ko‘z yosh pardasini yemirishi mumkin - bu ko‘z yosh suyuqligi tarkibining o‘zgarishiga va hajmining kamayishiga olib keladi. Natijada, issiq havoda quruq ko‘z sindromi deb ataladigan holatni sezish mumkin.

Bundan tashqari, ultrabinafsha nurlanish ko‘z gavhari shikastlanishining asosiy sababchisi hisoblanadi, bu esa keyinchalik kataraktaga olib kelishi mumkin. Ushbu kasallik ko‘pincha ekvatorga yaqin joylashgan mamlakatlarda yashovchi odamlarda yoshligida rivojlanishi bejiz emas. Quyosh insolyatsiyasi yuqori bo‘lgan hududlarda yashovchi odamlarda tez-tez tashxis qo‘yiladigan yana bir kasallik pterigium bo‘lib, unda konyunktiva duplikaturasi ko‘z shox pardasining oldingi yuzasiga o‘sib chiqa boshlaydi, bu ko‘zning changli havo va ortiqcha quyosh nuriga o‘ziga xos himoya reaksiyasidir.

Quyosh nurlari ta’siriga ko‘proq ko‘z kasalliklari (katarakta, to‘r parda distrofiyasi, glaukoma kabi) mavjud bo‘lgan, shuningdek, melanin darajasi past bo‘lgan, ya’ni kulrang, yashil va ko‘k ko‘zlar va oq rangli teri egalari ko‘proq moyil bo‘ladi.

Faol quyoshdan himoyalanish uchun shifokor keng hoshiyali ko‘zoynak taqish va panama kiyishni qat’iy tavsiya qiladi.