Krasnodar oʼlkasida kontrafakt dori vositalarini sotuvchi noqonuniy dorixonalar tarmogʼi faoliyati toʼxtatildi. Xaridorlar bu yerdan dori vositalarini shifokorning retseptisiz sotib olishi mumkin boʼlgan.

Krasnodar oʼlkasi boʼyicha Tergov qoʼmitasi maʼlumotlariga koʼra, jinoiy sxema ikki aka-uka tomonidan ishlab chiqilgan va keyinchalik jinoiy sheriklar guruhi 27 nafarga koʼpaytirilgan.

Aniqlik kiritilishicha, aka-uka viloyatning turli tumanlaridagi taʼlim muassasalari yonida joylashgan noturar joyni ijaraga olib, dorixonalardek jihozlagan. Shunday qilib, bunday noqonuniy muassasalarning butun tarmogʼi yaratilgan. Sotuvchilar orasida maxsus maʼlumotga ega boʼlmagan va farmatsevtika sohasida oʼqimagan odamlar boʼlgan.

Guruh aʼzolari 2024-yilning 4-iyuniga qadar isteʼmolchilarga shu jumladan voyaga yetmaganlarga qalbaki dori vositalarini sotgan. "Farmatsevtlar" retsept soʼrashmagan. Sudlanuvchilarning jinoiy harakatlari natijasida toʼrt nafar bola qalbaki dori vositalarini isteʼmol qilish natijasida vafot etgan.

Voyaga yetmaganlarning oʼlimiga sabab boʼlgan uyushgan guruh tomonidan qalbaki dori vositalarini sotish holatlari yuzasidan jinoyat ishi qoʼzgʼatilgan. Jinoyat ishi yuzasidan olib borilgan tergov doirasida 50 dan ortiq manzillarda yashash joylari va dorixonalar bilan jihozlangan binolarda tintuvlar oʼtkazilgan.

Jinoiy guruh ishtirokchilari va tashkilotchilarining mulklari, shuningdek, bankdagi hisob raqamlaridan 100 million rubldan ortiq pullar olib qoʼyilgan.