Tabiat qo‘ynida sayr qilish surunkali bel og‘rig‘idan aziyat chekayotgan odamlarga kasallikni yengishda sezilarli yordam berishi mumkin - Plimut va Ekseter universitetlari tadqiqotchilari shunday xulosaga kelishdi.

Ularning tadqiqot natijalari The Journal of Pain jurnalida e’lon qilindi.

Mualliflar 5 yildan 38 yilgacha og‘riqni boshdan kechirgan o‘n kishini so‘roqdan o‘tkazdilar. Ularning barchasi ochiq havoda bo‘lish - hatto qisqa muddat bo‘lsa ham - noxush his-tuyg‘ulardan chalg‘ishga, tashvish darajasini pasaytirishga va o‘zini ijtimoiy hayotga ko‘proq jalb qilinganday his etishga yordam berishini ta’kidladilar. Ayniqsa, suv bilan muloqot, o‘rmon shovqinlari va shunchaki uydan tashqarida harakat qilish imkoniyati juda muhim ekan.

Ishtirokchilar tabiatni kasallikdan chalg‘ish va umumiy ahvolni yaxshilash vositasi sifatida qabul qilishdi. Sport zallariga nisbatan, parklar va qirg‘oq bo‘ylari kamroq stress va ko‘proq zavq bag‘ishladi. Biroq, ba’zilar bunday joylarga borishning qiyinligidan noliganlar: notekis yer, o‘rindiqlar yoki tayanch nuqtalarining yo‘qligi sayr qilishni mushkul qilgan.

Olimlar nafaqat reabilitatsiyada tabiatning ahamiyatini e’tiborga olishni, balki shahar hududlarini og‘riq sindromi bo‘lgan odamlarning ehtiyojlariga moslashtirish kerakligini ham taklif qilmoqdalar. Bunga qo‘shimcha ravishda, jamoa hatto uydan chiqa olmaydiganlar uchun ham tabiat qo‘yniga "sho‘ng‘ish" imkonini beruvchi virtual texnologiyalarni ishlab chiqmoqda.

Tadqiqotchilar ta’kidlashicha, tabiiy muhit bilan aloqa - bu surunkali kasalliklarga chalingan millionlab odamlar uchun hayot sifatini oshirishning arzon va xavfsiz usulidir.