Ko‘pchilik antibiotiklarni albatta kamida yetti kun qabul qilish va ahvoli yaxshilangan bo‘lsa ham, belgilangan davolash kursini oxirigacha tugatish kerak, deb hisoblaydi. Biroq so‘nggi tadqiqotlar shuni ko‘rsatmoqdaki, ayrim keng tarqalgan bakterial infeksiyalarda qisqa muddatli antibiotik kurslari uzoq muddatli davolash kabi samarali bo‘lishi, ayni paytda xavfsizroq bo‘lishi mumkin.

Tadqiqotchilar 1475 nafar katta yoshli kishidan so‘rov o‘tkazgan. Ularning qariyb 60 foizi antibiotiklarni kamida yetti kun qabul qilishni ma’qul ko‘rishini bildirgan. 88 foiz ishtirokchi esa shifokor belgilagan antibiotik kursini har doim to‘liq yakunlash kerak, deb hisoblagan. Shuningdek, 63 foizi uzoq muddatli davolashni samaraliroq, 61,5 foizi esa xavfsizroq deb baholagan.

Mualliflar ta’kidlashicha, so‘nggi yillarda o‘tkazilgan 120 dan ortiq randomizatsiyalangan tadqiqotlar ayrim keng tarqalgan bakterial infeksiyalarda qisqa muddatli antibiotik kurslari uzoq muddatli kurslardan kam samarali emasligini ko‘rsatgan. Bundan tashqari, qisqa kurslar antibiotiklarga chidamlilik — antibiotikorezistentlik xavfini oshirmasligi qayd etilgan.

Biroq bu antibiotiklarni o‘zboshimchalik bilan ertaroq to‘xtatish mumkin, degani emas. Davolash davomiyligi infeksiyaning turi, qo‘llanilayotgan preparat va bemorning umumiy holatiga qarab belgilanadi. Shuning uchun antibiotikni qancha muddat qabul qilish kerakligini shifokor hal qilishi lozim.

Ya’ni, masala «ahvolingiz yaxshilanishi bilan antibiotik qabul qilishni to‘xtatish» haqida emas. Gap shundaki, zamonaviy tibbiyotda ayrim infeksiyalar uchun antibiotiklar avval qo‘llanilgan sxemalarga qaraganda qisqaroq muddatga belgilanishi mumkin. Bunda asosiy mezon — bemorning individual holati va infeksiya xususiyatlaridir.

Muhim: antibiotiklarni faqat shifokor tavsiyasi bilan qabul qilish va belgilangan davolash sxemasini o‘zboshimchalik bilan o‘zgartirmaslik kerak.