Кўпчилик антибиотикларни албатта камида етти кун қабул қилиш ва аҳволи яхшиланган бўлса ҳам, белгиланган даволаш курсини охиригача тугатиш керак, деб ҳисоблайди. Бироқ сўнгги тадқиқотлар шуни кўрсатмоқдаки, айрим кенг тарқалган бактериал инфекцияларда қисқа муддатли антибиотик курслари узоқ муддатли даволаш каби самарали бўлиши, айни пайтда хавфсизроқ бўлиши мумкин.

Тадқиқотчилар 1475 нафар катта ёшли кишидан сўров ўтказган. Уларнинг қарийб 60 фоизи антибиотикларни камида етти кун қабул қилишни маъқул кўришини билдирган. 88 фоиз иштирокчи эса шифокор белгилаган антибиотик курсини ҳар доим тўлиқ якунлаш керак, деб ҳисоблаган. Шунингдек, 63 фоизи узоқ муддатли даволашни самаралироқ, 61,5 фоизи эса хавфсизроқ деб баҳолаган.

Муаллифлар таъкидлашича, сўнгги йилларда ўтказилган 120 дан ортиқ рандомизацияланган тадқиқотлар айрим кенг тарқалган бактериал инфекцияларда қисқа муддатли антибиотик курслари узоқ муддатли курслардан кам самарали эмаслигини кўрсатган. Бундан ташқари, қисқа курслар антибиотикларга чидамлилик — антибиотикорезистентлик хавфини оширмаслиги қайд этилган.

Бироқ бу антибиотикларни ўзбошимчалик билан эртароқ тўхтатиш мумкин, дегани эмас. Даволаш давомийлиги инфекциянинг тури, қўлланилаётган препарат ва беморнинг умумий ҳолатига қараб белгиланади. Шунинг учун антибиотикни қанча муддат қабул қилиш кераклигини шифокор ҳал қилиши лозим.

Яъни, масала «аҳволингиз яхшиланиши билан антибиотик қабул қилишни тўхтатиш» ҳақида эмас. Гап шундаки, замонавий тиббиётда айрим инфекциялар учун антибиотиклар аввал қўлланилган схемаларга қараганда қисқароқ муддатга белгиланиши мумкин. Бунда асосий мезон — беморнинг индивидуал ҳолати ва инфекция хусусиятларидир.

Муҳим: антибиотикларни фақат шифокор тавсияси билан қабул қилиш ва белгиланган даволаш схемасини ўзбошимчалик билан ўзгартирмаслик керак.