O‘zbekiston hukumati shaxsiy ehtiyoj uchun biologik faol qo‘shimchalarni (BADlar) olib kirishga cheklovlar kiritadi.

2025-yil 20-iyuldan boshlab O‘zbekistonda jismoniy shaxslar tomonidan shaxsiy ehtiyoj uchun biologik faol qo‘shimchalarni (BADlar) bojsiz olib kirish qoidalari joriy etiladi. Bu Vazirlar Mahkamasining 19-apreldagi qarorida nazarda tutilgan.

Hujjatga ko‘ra, endilikda jismoniy shaxslar oziq-ovqat qo‘shimchalarini quyidagi miqdorda bojxona to‘lovlarisiz olib kirishlari mumkin bo‘ladi (shu paytgacha hech qanday cheklovlar yo‘q edi):

- suyuq holatida va sirop shaklida — 10 donagacha flakonda;

- kukun holatida — 0,5 kilogrammgacha;

- tabletka — 100 donagacha;

- kapsula — 100 donagacha yoki 4 donagacha PET idishlarda;

- quritilgan holatda (o‘simlik guli, tana qismi va ildizi) — 0,5 kilogrammgacha.

Bundan tashqari, qarorda boshqa bir qator tovarlarni bojsiz olib kirish qoidalariga ham aniqlik kiritildi yoki o‘zgartirildi.