Ўзбекистонда жорий йил бошидан буён менингококк инфекцияси билан боғлиқ ҳолатлар кўпайган. Инфекция билан боғлиқ 174 та ҳолатнинг 168 таси болалар билан боғлиқ. Бу ҳақда Санитария-эпидемиология қўмитаси хабар берди.

Идора ўз хабарида 2026 йилда Ўзбекистонда аҳоли орасида менингококк инфекцияси билан боғлиқ ҳолатлар бироз ортганини қайд этган. Билдирилишича, шу муносабат билан аҳоли, айниқса болалар орасида ушбу инфекция кенг тарқалишини олдини олиш мақсадида 8024 доза вакцина харид қилиниб, беморлар билан мулоқотда бўлган 4862 нафар фуқаро эмлаш билан қамраб олинган. Вакцина билан эмлашга тиббий монелиги бўлган беморлар билан мулоқотда фуқаролар шифокорлар назоратида кимёвий профилактика тадбирлари амалга оширилмоқда.

“Республикамизда 2026 йилнинг 1-чорагида 174 та менингококк ҳолати рўйхатга олинган бўлиб шундан 168 нафари 14 ёшгача бўлган болаларни ташкил қилмоқда. Касаллик динамикасига кўра, апрель ойида март ойига нисбатан 14 фоизга камайганлиги кузатилмоқда”, дейилади хабарда.

Маълумот учун, менингит – бу бош ва орқа мия пардаларининг яллиғланиши бўлиб, кўпинча бактерия ёки вируслар сабабли юзага келади ва тез ривожланиши билан хавфли. Олдини олиш чораларига қуйидагилар киради:

• ўз вақтида эмланиш;
• шахсий гигиена қоидаларига риоя қилиш;
• касаллик аломатлари кузатилганда дарҳол шифокорга мурожаат қилиш;
• жамоат жойларида эҳтиёт чораларини кўриш.

Шунингдек, Ҳаж ва Умра сафарларига боришдан аввал менингококк инфекциясига қарши эмланишларини зиёратдан келгандан сўнг оммавий тадбирлардан чекланиш тавсия қилинади. Эмлаш – менингококк инфекциясидан ишончли ҳимояланишнинг энг самарали усулларидан бири.

Санэпидқўмитага кўра, республикада эпидемиологик вазият барқарорлигини сақлаш учун кенг кўламли чоралар амалга оширилмоқда. Мамлакатдаги эпидемиологик вазият ва кўрилаётган чоралар ҳақида ишончли манбалардан маълумот олиш сўралади.