Hospira компанияси шприцлар билан боғлиқ муаммолар туфайли ўзининг инъекцион дори-дармонларини 5 та партиясини қайтариб олишини эълон қилди. 

Гап 2023-йил сентабридан 2024-йил апрелигача бутун Қўшма Штатлар бўйлаб тиббиёт ходимлари ва фармацевтика дистрибьюторларига тарқатилган бупренорфин гидрохлорид аналгетики (икки партия) ва гипертензияга қарши лабеталол гидрохлорид дориси (уч партия) ҳақида кетмоқда. Биринчи маҳсулотнинг амал қилиш муддати шу йилнинг сентябр ва октябр ойларида, иккинчисининг муддати 2025 йилда тугайди. 

Иккала дори ҳам Pfizerнинг Carpuject инжектор шприцларида тақдим этилади. Гарчи компания қайтариб олинган партиялар билан боғлиқ ножўя таъсирлар ҳақида ҳали маълумот олмаган бўлса-да, уларни сотишни тўхтатишга қарор қилди.

Pfizer, FDAга эълон қилган баёнотида, мижознинг маҳсулот оқиб кетганлиги ҳақидаги шикоятидан кейин хавотир пайдо бўлганлигини айтди. Компания потенциал нуқсонли маҳсулотларни қайтариб олмоқда ва ушбу препаратнинг захиралари бўлганларга уни тарқатиш ва ишлатишни тўхтатишни маслаҳат бермоқда.