Дорихоналардан дори воситаларини имтиёзли ажратиш Ўзбекистон Республикаси Соғлиқни сақлаш вазирлиги томонидан тасдиқланган бланкаларда даволовчи врачлар томонидан ёзилган рецептлар бўйича амалга оширилади.

Рецептни олиш учун беморлар (ота-оналар ёки уларнинг ўрнини босувчи шахслар, қариндошлар) амбулаторияда даволанишда дори воситалари билан имтиёзли таъминланиш ҳуқуқини тасдиқлайдиган ҳужжатни кўрсатган ҳолда беморлар ҳисобда турадиган жойдаги ёки тиббий хизмат кўрсатиш учун бириктирилган жойдаги амбулатория-поликлиника муассасасига мурожаат қилади.

Рецептда дори воситалари даволашнинг бир курсидан ортиқ бўлмаган миқдорда тиббий кўрсаткичлар бўйича ёзилади. Рецепт берилган кундан бошлаб бир ой мобайнида ҳақиқий ҳисобланади.

Дорихоналардан бериладиган дори воситаларининг миқдори ва дозаси рецептда кўрсатилган миқдор ва дозага мувофиқ бўлиши керак.

Дори воситасини беришда рецептнинг йиртиб олинадиган корешокларига берилган дори воситасининг номи, миқдори, серияли рақами, фармацевтнинг фамилияси, исми, отасининг исми ёзилади, унинг имзоси қўйилади. Дорихонанинг штампи босилади. Бемор орқа томондаги биринчи йиртиб олинадиган корешокка имзо чекади, у кейинчалик уни ҳақ тўлаш учун амбулатория-поликлиника муассасасига тақдим этиш учун дорихонада сақланади. Иккинчи корешок беморга берилади.