Макгилл университети (Канада) олимлари янги лаборатория таҳлили ёрдамида ўсмирларда депрессия ривожланганда қондаги миқдори ортадиган тўққизта молекулани аниқлашга эришдилар.

Ушбу молекулаларнинг миқдорига асосланиб, олимлар вақт ўтиши билан касаллик белгиларининг кучайиш хусусиятларини аниқлай олдилар.

Клиник тадқиқот натижалари депрессияни белгилари кучайишидан олдин, эрта босқичларда аниқлаш усулини ишлаб чиқиш имконини берди.

Бунда катта ёшли беморларда мазкур тўққизта молекула (микроРНК) миқдорининг ошиши кузатилмади. Бу эса ушбу биологик жараёнлар фақат ўсмирларга хос бўлиши мумкинлигини тахмин қилишга асос бўлади.

Тадқиқот доирасида қон намуналари олиниб, уларнинг молекуляр яхлитлигини сақлаш мақсадида қуритилди ва музлатилди. Намуналарни олиш, сақлаш ва ташиш жараёни осон бўлгани сабабли, бу усул клиник амалиётда кенг қўлланилиши мумкин.

Усул намуналардан микроРНКни ажратиб олиш ва кейинчалик уни таҳлил қилишни ўз ичига олади.

Тадқиқотнинг биринчи муаллифи Алиса Моргунова айтишича, олинган натижалар руҳий касалликларнинг ривожланишига ҳамроҳ бўлган дастлабки биологик ўзгаришларни кузатиш имконини берувчи усулдан амалда фойдаланиш мумкинлигини тасдиқлайди.

Тадқиқотчилар олинган натижаларни ўсмирларнинг каттароқ гуруҳлари орасида тасдиқлашни ва микроРНКнинг генетик хавф омиллари ҳамда ташқи муҳит таъсири билан ўзаро алоқа механизмларини ўрганишни режалаштирмоқдалар.