Тамаки чекиш, унинг қайси турига мансуб бўлишидан қатъи назар, қандли диабетнинг иккинчи тури ривожланиш эҳтимолини сезиларли даражада оширади.

Бу ҳақда Швеция, Норвегия ва Финляндия олимлари Вена шаҳрида бўлиб ўтган Европанинг Қандли диабетни ўрганиш ассоциацияси (EASD) йиллик анжуманида маълум қилди.

Тадқиқотчилар 7 минг нафардан ортиқ инсоннинг маълумотларини таҳлил қилган ҳолда, тамаки чекувчиларда инсулинга қаттиқ қаршилик билан боғлиқ диабет шакли (SIRD) ривожланиш эҳтимоли икки баробар юқори эканини аниқладилар. Шунингдек, инсулин етишмовчилиги, семизлик ёки ёш билан боғлиқ диабет турлари ривожланиш хавфи ҳам 20 фоиздан 57 фоизгача ошиши мумкинлиги қайд этилди.

Тадқиқот шуни кўрсатдики, генетик мойилликка эга инсонлар айниқса хавф остида. Уларда тамаки чекиш ва ирсий омиллар биргаликда касалликка чалиниш эҳтимолини уч баробаргача оширади.

Муаллифлар таъкидлашича, тамакидан воз кечиш қандли диабетнинг олдини олишдаги асосий профилактик чоралардан бири бўлиши лозим.