Биринчи марта ўтказилган тадқиқот шуни кўрсатдики, педиатрлар болалардаги нафас йўлларининг асоратланмаган инфекцияларини даволашда антибиотикларни "ҳар қандай ҳолатда" қўлламасликлари керак.

Натижалар The Lancet журналида чоп этилган.

Aмоксициллин (амоксиклав) пенициллинлар гуруҳидан ярим синтетик антибактериал восита бўлиб, у катталар ва болаларда бронхит, тонзиллит, пневмония, ўртача оти ва бошқа касалликларни даволашда қўлланилади. Aнтибиотик Жаҳон соғлиқни сақлаш ташкилотининг асосий дори воситалари рўйхатига киритилган ва клиник амалиётда кенг қўлланилади.

Саутгемптон университети олимлари пневмонияга шубҳа бўлмаган болаларда нафас йўлларининг асоратланмаган инфекцияларида амоксициллинни қўллаш қанчалик асосли эканлигини баҳолашга қарор  қилишди. Мутахассислар ўз илмий ишларида антибиотикларга чидамлилик глобал муаммога айланиб бораётганини, улардан ортиқча фойдаланишнинг олдини олиш жуда муҳимлигини таъкидладилар.

Янги тадқиқот Aнглия ва Уэльсдаги ўртача оғир аломатлар билан юқори нафас йўлларининг инфекциялари бўйича амбулатор шароитда даволанаётган 6 ойликдан 12 ёшгача бўлган 432 нафар болани қамраб олди. Ёш беморлар иккита гуруҳга бўлинган, улардан бири етти кун давомида кунига уч марта амоксициллин, иккинчи гуруҳ эса плацебо қабул қилган. Шифокорлар ва ҳамширалар терапия бошланишидан аввал симптомларни баҳолашди ва ота-оналар боланинг аҳволи ҳақида кундалик қайдларни тўлдиришди.

Натижада, олимлар иккала гуруҳдаги болалар тахминан бир хил вақт оралиғида соғлиги тикланганини аниқланди - фарқ ўртача 13% ни ташкил қилди, яъни клиник жиҳатдан аҳамиятсиз. Бундан ташқари, энг оғир белгилар - юқори иситма, нафас қисилиши ва кўкрак қафасидаги хириллаш симптомларининг давомийлигида ҳам сезиларли фарқлар бўлмаган.

Aмоксициллинни қабул қилган беш бола ва назорат гуруҳидаги тўрт нафар бемор стационар текширувидан ўтказилди. Бошқа камроқ аҳамиятли кўрсаткичлар, масалан, ота-оналарнинг болага ғамхўрлик қилиш учун касаллик таътилининг давомийлиги ва даволаниш учун зарур бўлган рецепциз дори-дармонларнинг нархи иккала гуруҳ ўртасида фарқ қилмади.

"Aгар пневмонияга шубҳа бўлмаса, шифокорлар ота-оналарни касалликнинг қандай кечиши, нималар кузатилиши ва соғайиш кузатилиши ҳақида хабардор қилишлари керак. Aммо нафас олиш йўллари инфекциялари бўлган кўпчилик болаларга антибиотикларни буюрмаслик керак", - дея хулоса қилишди тадқиқот муаллифлари.