Россия Соғлиқни сақлаш вазирлигига қарашли Санкт-Петербург давлат педиатрия тиббиёт университети олимлари COVID-19 билан касалланган болаларнинг ўпка тўқимасини ўрганишди, деб хабар берди Соғлиқни сақлаш вазирлигининг Телеграм-каналида.

“Жаҳон нашрларида болаларда коронавирус инфексиясининг ўзига хос кўринишлари ҳақида маълумотлар йўқ эди. Биз биринчи навбатда қайси тузилмаларга ва қай даражада таъсир кўрсатаётганини аниқладик”, — деди Вероника Галичина, тадқиқот ҳаммуаллифи.

Тадқиқотлар натижасида мутахассислар COVID-19 биринчи навбатда ўпка микротомирлари эндотелийсига салбий таъсир кўрсатишини аниқладилар. Бу органлар ва тўқималарнинг ҳужайралари кислород ва озуқа моддаларини олишни тўхтатиб қўйишига олиб келади.

"Олинган маълумотлар қон томир деворини вирусли таъсирлардан ҳимоя қиладиган дори-дармонларни ишлаб чиқишда ёрдам бериши мумкинлигига ишонамиз", деди Вероника Галичина.

Олимларнинг иши Швейцария журналида нашр этилган ва ковид бўйича молекуляр тадқиқотлар соҳасидаги сўнгги ютуқлар рўйхатига киритилган.

Ҳозирда мутахассислар катталар ва болаларда касалликнинг кечишини қиёсий таҳлил қилишмоқда.