Эдинбург университети олимлари аниқлашича, кенг қўлланиладиган антибиотик доксициклин айрим ёшларда шизофрения ривожланиш эҳтимолини камайтиради.

Тадқиқот натижалари American Journal of Psychiatry (AJP) журналида эълон қилинган.

Доксициклин — кенг таъсир доирасига эга антибиотик бўлиб, у кўпинча инфекциялар ва теридаги тошмаларга қарши қўлланилади.  Илгари бу мия ҳужайраларида яллиғланишни камайтириши ва синаптик кесиш — мия ортиқча нейрон алоқаларини олиб ташлаш жараёнига таъсир қилиши мумкинлиги кўрсатилган эди. Нейробиологлар маълумотларига кўра, бундай кесишнинг ортиқча фаоллиги шизофрения ривожланиши билан боғлиқ.

Шизофрения одатда ёшликнинг илк даврида намоён бўлади. Бу оғир руҳий касаллик галлюцинациялар, васвасалар ва фикрлаш бузилишлари билан кечади.

Тадқиқотчилар 56 мингдан ортиқ ўсмирлар ҳақидаги маълумотларни таҳлил қилдилар. Бу ёшлар психиатрик ёрдамга мурожаат қилган ва турли антибиотиклар қабул қилган. Доксициклин қабул қилган беморларда шизофрения ривожланиш хавфи бошқаларга нисбатан 30–35 фоизга паст эканлиги аниқланди.

«Шизофрения кейинчалик ривожланган иштирокчиларнинг деярли ярми илгари бошқа муаммолар сабабли болалар психиатрия хизматларига мурожаат қилган», — дея таъкидлади тадқиқот раҳбари профессор Иэн Келлехер.

Тадқиқотчиларнинг таъкидлашича, олинган натижалар яллиғланишга қарши дори воситаларини янада чуқурроқ ўрганиш учун янги имкониятлар яратади. Хусусан, олимлар доксициклин ўсмирлардаги бошқа оғир руҳий касалликларни олдини олиш воситаси бўлиши мумкин ёки йўқлигини текширишни режалаштирмоқдалар.