Испаниянинг етакчи университетлари олимлари жисмоний машқлар болалар ва ўсмирларнинг IQ даражасини ўртача тўрт баллга оширишини аниқлашди. Бу тахминан қўшимча ўқиш йили билан бир хил натижани беради. Тадқиқот натижалари Pediatrics журналида чоп этилди.

Олимлар узоқ вақт давомида жисмоний фаолият нафақат жисмоний, балки руҳий саломатликка ҳам ижобий таъсир кўрсатишини, шунингдек, когнитив қобилиятларни яхшилашга ёрдам беришини таъкидладилар.

Илгари чоп этилган 14 та тадқиқотни қамраб олган мақолалар янги тадқиқот натижаларини тасдиқлади. Мета-таҳлил давомида олимлар 5 ёшдан 14 ёшгача бўлган 3203 нафар бола ва ўсмирнинг маълумотларини ҳисобга олишди. Мутахассислар жисмоний фаоллик интеллектнинг турли жиҳатларига, жумладан, умумий IQга, шунингдек, янги муаммоларни ҳал қилиш қобилиятига ва тўпланган билим ҳамда тажрибага таъсирини ўрганишди.

Натижалар шуни кўрсатдики, иштирокчиларнинг ёши, дастлабки жисмоний тайёргарлиги ва бошланғич интеллект даражасидан қатъи назар, мунтазам жисмоний машқлар уларнинг когнитив қобилиятларига ижобий таъсир кўрсатди. Ўртача, спорт билан шуғулланган болалар ва ўсмирларнинг IQ даражаси тўрт поғонага ошди.