Pfizer ўзининг жиғилдон қайнашига қарши дорисиr Zantac (ранитидин) препаратини қабул қилгандан кейин саратон хавфи ошганлиги туфайли компанияга қарши қўзғатилган 10 000 дан ортиқ даъволарини ҳал қилиш учун 250 миллион долларгача тўлашга рози бўлди. Бу ҳақда Британиянинг Financial Times газетаси ёзмоқда.

Фармацевтика гиганти ва Aмерика штатлари ўртасида тузилган келишувлар Zantac билан боғлиқ суд жараёнларининг фақат бир қисмини ҳал қилади. Молиявий тафсилотлар ҳали тўлиқ ошкор этилмаган.

Zantac биринчи марта 1983 йилда регуляторлар томонидан тасдиқланган. 1988 йилда унинг йиллик сотуви 1 миллиард доллардан ошганидан кейин у дунёдаги энг кўп сотиладиган дори воситаларидан бирига айланди. Препаратга бўлган ҳуқуқлар кейинчалик Pfizer га, кейин Boehringer Ingelheim га ўтказилди ва 2017 йилда улар Sanofi компаниясига сотилган.

Бироқ, 2020 йилда AҚШ озиқ-овқат ва фармацевтика идораси (ФДA) ракета ёқилғиси ва мойлаш материалларини ишлаб чиқаришда қўлланиладиган канцероген NDMA (N-нитрозодиметиламин) топилганлиги сабабли Zantac ва унинг женерикларини бозордан олиб ташлашни талаб қилди. Ушбу модда соғлиқ учун хавфли бўлиб, турли хил ҳайвонларда саратон касаллигини келтириб чиқаради. Ушбу модданинг бир миллиграмдан кам дозаси ҳам саратон ўсмаларининг ривожланишига олиб келади.

Pfizer 1998 йилдан 2006 йилгача жиғилдон қайнашига қарши дори сотган. Фармацевтика гиганти саратон касаллигининг пайдо бўлиши ва препаратни рецепт бўйича қабул қилиш ўртасида ҳеч қандай боғлиқлик йўқлигини таъкидлашда давом этмоқда.

Ўтган ой Sanofi компаниянинг дори-дармонларини қабул қилиш саратон хавфини келтириб чиқариши билан боғлиқ 4 минг даъвони ҳал қилишга муваффақ бўлди, лекин шартноманинг молиявий шартларини ошкор қилмаган.