"Дори-Дармон" акциядорлик компанияси тижорат ишлари бўйича директори Рамил Абдулов, "Навоий Дори-Дармон" АЖ Бошқарув раиси Ғулом Орзиев "The United Laboratories" компанияси бош директори жаноб Ву Шутинг, ташқи иқтисодий алоқалар бўлими бошлиғи Кармен Ян билан учрашув ўтказди.

Учрашув аввалида Рамил Абдулов "Дори-Дармон" акциядорлик компаниянинг фаолияти, имкониятлари, ишлаб чиқариш корхоналари, Республика бўйича мавжуд дорихоналар тармоғи, кўчма дорихоналари ва Ўзбекистон фармацевтика бозоридаги ўрни ҳақида маълумотлар бериб ўтди.

Ўз ўрнида меҳмонлар ҳам "The United Laboratories " фармацевтика маҳсулотларини тадқиқ қилиш, ишлаб чиқариш ва сотиш билан шуғулланувчи Хитойнинг етакчи интеграциялашган фармацевтика компаниялари қаторига киришини таъкидлади.

Компания томонидан 70 дан ортиқ тайёр маҳсулотлар, жумладан кимёвий препаратлар, биологик маҳсулотлар, шунингдек, гипогликемик дорилар, инфекцияга қарши, йўталга қарши дорилар, аналгетиклар, антибиотиклар, дерматологик дорилар , гепатитга қарши дори воситалари, офталмологик ва неврологик препаратлар, юрак-қон томир касалликлари учун дори воситалари ишлаб чиқарилади. Ишлаб чиқариш Жаҳон соғлиқни сақлаш ташкилотининг GMP стандартларига жавоб беради.

The United Laboratories ҳозирда еттита ишлаб чиқариш базасига эга, 80 га яқин мамлакат ва минтақаларда савдо тармоқлари мавжуд.

Учрашув давомида Хитой ишлаб чиқарувчиси компания маҳсулотларини "Дори-Дармон" акциядорлик компаниясининг дорихоналар тармоғи орқали сотишга қизиқиш билдирди, икки томон Ўзбекистон фармацевтика бозорига кириш, талаб ва эҳтиёжлар, дори воситаларини рўйхатдан ўтказиш ва бошқа масалалар юзасида фикр алмашди. Шунингдек, "Навоий Дори-Дармон" АЖ таркибидаги “Авиценна” гален дори воситалари ишлаб чиқарувчи масъулияти чекланган жамиятига инвестиция киритиш юзасидан ҳам мунозалар олиб борилди.

Учрашув якунида, томонлар алоқаларни мустаҳкамлаш ҳамда компания вакилларини The United Laboratories фаолияти билан яқиндан танишишлари учун Хитойга ташрифини ташкил этиш масаласини кўриб чиқишга келишиб олдилар.