«Росгосстрах» компанияси мутахассислари Скандинавия соғлиқни сақлаш маркази билан ҳамкорликда инсон организмига салбий таъсир кўрсатиб, онкологик касалликлар келиб чиқишига сабаб бўлиши мумкин бўлган озиқ-овқат маҳсулотлари ва одатлар рейтингини тузди. Ушбу рўйхатга микротўлқинли печда тайёрланадиган попкорн, энергетик ичимликлар, қайта ишланган гўшт маҳсулотлари ҳамда чекиш киритилди.

Бир неча дақиқада микротўлқинли печда тайёрланадиган попкорннинг хавфи унинг қадоқлаш материали ва хушбўй қилувчи қўшимчаларида ишлатиладиган кимёвий моддалар билан боғлиқ. Қиздириш жараёнида пакетнинг ички қатламидан айрим моддалар доналарга ўтиб кетиши мумкин, бу доналар эса аллақачон синтетик таъм берувчи қўшимчалар билан қопланган бўлади. Бундай комбинация организмга кириб, ҳужайраларни шикастлаши ва шу орқали саратон ривожланишига олиб келувчи жараёнларни қўзғатиши мумкин. Шунинг учун попкорнни қопқоқли товада ёки микротўлқинли печда ёпиқ шиша идишда тайёрлаш тавсия этилади.

Шунингдек, рейтингга энергетик ичимликлар ҳам киритилди. Уларда шакар, кофеин ва сунъий қўзғатувчи моддалар миқдори юқори бўлгани сабабли юрак-қон томир ва эндокрин тизимларга кучли ортиқча юклама тушади. Энергетик ичимликларни мунтазам истеъмол қилиш моддалар алмашинувининг бузилишига, иммунитетнинг сусайишига олиб келади. Натижада сурункали касалликлар ва саратон ривожланиши учун қулай шароит вужудга келади.

Колбаса ва бошқа қайта ишланган гўшт маҳсулотлари ҳам хавфли ҳисобланади. Уларда нитрит ва нитратлар қўшилади: бу моддалар маҳсулотга ранг бериб, уларнинг сақланиш муддатини узайтиради, лекин қиздириш (пишириш, қовуриш,) жараёнида канцероген бирикмаларга айланади. Мутахассислар тахминига кўра, бундай маҳсулотларни мунтазам истеъмол қилиш ошқозон-ичак тизимида саратон ривожланиши хавфини оширади.

Алоҳида эътибор қаратилиши керак бўлган жиҳат — чекиш. Тамаки маҳсулотлари ва вейпларни истеъмол қилиш ўпка саратон ривожланишида катта рол ўйнайди.

Соғлом турмуш тарзини юритиш оғир касалликлар, жумладан онкологик касалликлар ривожланиш хавфини сезиларли даражада камайтиради. «Росгосстрах» онкосуғурта полислари бўйича ҳолатларнинг 10 фоизи йўғон ичак саратонлари ҳиссасига тўғри келади, шунинг учун озиқ-овқат танловига эътибор қаратиш ва вақтида шифокор кўригидан ўтиш жуда муҳим.

«Озиқ-овқат танлаши саратон ривожланиш хавфига таъсир қилувчи муҳим омил ҳисобланади. Бу ерда фақатгина муайян маҳсулотларнинг рационда мавжудлиги эмас, балки овқатланиш режими, тайёрлаш ва сақлаш усули ҳам аҳамиятга эга», — деди Скандинавия Соғлиқни Сақлаш Маркази онколог шифокори Сергей Иванов.