Қозоғистоннинг Ақмола вилояти Отбосар туманидаги икки қишлоқ куйдирги аниқлангани сабабли карантинга ёпилди. Бу ҳақда Қозоғистон Қишлоқ хўжалиги вазири Айдарбек Сапаров маълум қилди.

Қайд этилишича, жорий йилнинг июнь ойи охирида Соғлиқни сақлаш вазири Ақмарал Алназарова Отбосар туманида бир неча кишида куйдирги аниқлангани ҳақида хабар берган. Ўшанда тўрт нафар бемор ҳақида айтилган, уларнинг аҳволи ўртача оғирликда деб баҳоланган. Вазир уларнинг барчасига зарур тиббий ёрдам кўрсатилаётганини билдирган, эпидемия тарқалишининг олдини олиш чоралари кўрилаётгани айтилган. Ўша вақтда Алназарова туманда карантин жорий этилмаслигини билдирган.

Аммо маълум бўлишича, Отбосарда карантин барибир жорий этилган. Айдарбек Сапаровнинг айтишича, касаллик аниқланган қишлоқларда дастлаб чеклов чоралари жорий этишган. Ҳозирда 7 кишида куйдирги аниқланган, улардан бири оғир аҳволда.

“Бу ҳудудларга на одамлар, на чорва ҳаракати бўлиши керак. Биз уларни тўсиб қўйдик, шлагбаум ўрнатилди. Республика эпизоотик гуруҳимиз дезинфекция, ишлов бериш ва йўқ қилиш ишларини олиб борди. Лаборатория хулосасини олганимиз заҳоти 1 июль куни карантин эълон қилдик. 19 киши касалланган, улардан бири оғир аҳволда, қолганларининг аҳволи ўртача. Улар шифокорлар назоратида, соғайишмоқда. Соғлиқни сақлаш тизими уларни назоратга олган,” дейди Сапаров ҳукумат брифингида.

Вазирнинг сўзларига кўра, карантин 15 кун давом этади. Шундан сўнг янгитдан таҳлиллар олинади. Агар куйдирги тасдиқланмаса, чекловлар бекор қилинади. Кейинчалик вазирлик матбуот хизматининг аниқлик киритишича, Айдарбек Сапаров хато қилган – жами 19 кишидан таҳлил олинган, улардан етти нафари куйдиргига чалингани тасдиқланган, қолган 12 нафарининг натижалари манфий чиққан.

Маълумот учун, куйдирги – Bacillus anthracis бактерияси сабабли юзага келадиган, барча турдаги уй ва ёввойи ҳайвонлар ҳамда одамлар учун ўта хавфли инфекцион касаллик ҳисобланади.