Спинал мушак атрофияси ташхиси қўйилган болаларни қўллаб-қувватлашга қаратилган янги тартиб жорий этилди.

Ҳукуматнинг 2026 йил 17 апрелдаги 184-сонли қарори билан ушбу тоифадаги бемор болаларни уй шароитида даволаш учун зарур тиббий жиҳозлар, протез-ортопедия воситалари ва реабилитация техникалари билан таъминлаш тартиби тасдиқланди.

Янги низомга кўра, боланинг ота-онаси ёки қонуний вакили яшаш жойидаги туман (шаҳар) тиббиёт бирлашмасига уйда даволаш бўйича ариза билан мурожаат қилади. Аризага якуний ташхис қўйилган тиббий хулоса ҳамда шифокорлар томонидан тавсия этилган зарур жиҳозлар рўйхати илова қилиниши шарт.

Мурожаатлар ҳудудий ишчи гуруҳ томонидан 10 кун ичида кўриб чиқилади. Шунингдек, ҳудудий ишчи гуруҳ ҳар йили 1 июнгача кейинги йил учун зарур жиҳозлар бўйича эҳтиёжни республика даражасига электрон шаклда тақдим этади.

Республика ишчи гуруҳи мазкур маълумотларни умумлаштириб, 15 июнга қадар Соғлиқни сақлаш вазирлигига тақдим этади. Вазирлик эса қонунчиликка мувофиқ тарзда тиббий жиҳозларни харид қилиш чораларини кўради.

Жиҳозлар ҳар йили 1 июлга қадар ҳудудларга тақсимланиб, етказиб берувчи ташкилотдан қабул қилингандан сўнг 10 кун ичида ота-оналарга шартнома асосида топширилади.