Гонконгнинг Insilico Medicine биотехнология компанияси ичак яллиғланиш касалликлари билан курашиш учун экспериментал молекула ишлаб чиқилганини эълон қилди.

Олимларнинг фикрича, сунъий интеллектдан фойдаланиш иш вақтини бир неча йилдан 12 ойгача қисқартиришга ёрдам берди.

Ичак яллиғланиш касалликлари иккита нозологик шаклни ўз ичига олади: ярали колит ёки носпецифик ярали колит (йўғон ичак яраси) ва Крон касаллиги. Улар асосан меҳнатга лаёқатли ёшдаги одамларда учрайди, ҳаёт сифатини оғир аломатлар билан ёмонлаштиради - қорин оғриғи, ичак ҳаракати билан боғлиқ муаммолар, вазн йўқотиш ва иш қобилиятини йўқотиш.

Компания маълумотларига кўра, сунъий интеллект ёрдамида ишлаб чиқилган молекула клиникадан олдинги синовларда ҳайвонларнинг ичак тўсиғи функциясини тиклаш қобилиятини кўрсатди. Ишлаб чиқувчилар ушбу молекулага асосланган препарат мавжуд аналогларга қараганда камроқ ён таъсирга эга бўлишига ишонишмоқда.

Маълумотларга кўра генератив кимё учун Chemistry42 сунъий интеллект платформасидан фойдаланиб, компания фақат ичакда ишлайдиган молекулани ишлаб чиқишга муваффақ бўлган. Препарат қон оқимига кирмайди, бу эса ножўя таъсирларни камайтиради.

Сунъий интеллект технологиялари туфайли компания молекулани ишлаб чиқишдан бошлаб клиникадан олдинги синов учун номзод қилиб кўрсатишгача бўлган бутун жараённи 12 ойдан камроқ вақт ичида якунлай олди, бу жараён одатда бир неча йил давом этарди. Insilico Medicine 2025 йил бошида клиник синовларнинг биринчи босқичи натижаларини тақдим этишни режалаштирмоқда.