AҚШда H5N1 парранда гриппидан биринчи ўлим ҳолати Луизианада қайд этилди. Бу ҳақда душанба куни маҳаллий соғлиқни сақлаш департаменти хабар берди.

"Луизиана соғлиқни сақлаш департаменти Қўшма Штатларда H5N1 (парранда гриппи) билан боғлиқ биринчи ўлим ҳолати ҳақида хабар берди," - дейилади вазирлик баёнотида. Унда, шунингдек, бемор штат касалхонасида ётгани ва 65 ёшдан ошганлиги қайд этилган.

"Ўзингизни ва оилангизни H5N1 дан ҳимоя қилишнинг энг яхши усули - бу вирус манбаларидан қочиш, яъни парранда гриппи билан касалланган ёки юқиши мумкин бўлган ёввойи қушлар ва бошқа ҳайвонларга яқинлашмасликдир," - деб маслаҳат беради Луизиана соғлиқни сақлаш департаменти.

Парранда гриппи биринчи марта AҚШда 2022-йил январ ойида Жанубий Каролина штатидаги ёввойи қушларда аниқланган, ўша йилнинг июль ойида эса вирус Калифорнияда қайд этилган. 2024-йил март ойида Техас ва Канзас штатларида сигирларда инфекция ҳолатлари қайд этилган эди. Шундан сўнг, Aмериканинг 10 штатида одамлар орасида 66 та ҳолат тасдиқланган.

Парранда гриппи - A турдаги грипп вируси штаммлари келтириб чиқарадиган юқумли касаллик. Касаллик бутун дунё бўйлаб тарқалган, ёввойи қушларнинг кўплаб турлари инфекцияни ташийди, аммо баъзиларида, шу жумладан уй ҳайвонларида ҳам касаллик ривожланиб, одамга юқиши мумкин.