Jahon iqtisodiy forumi «Kasblar kelajagi»ni o‘rgangan hisobotini e’lon qilindi. Hisobotni tayyorlashda sun’iy intellektning (SI) kasblarga ta’siri borasida ommaviy so‘rovnoma o‘tkazilgan. Bu haqida CNN nashri xabar berdi.

Unga ko‘ra, so‘rovda qatnashgan yuzlab yirik kompaniyalarning 77 foizi sun’iy intellekt kasblarni egallashidan xavotirda ekanligini bildirgan. SI bilan teng ishlash borasida o‘z xodimlarini tayyorlash bosqichini ham o‘tkazish niyatida ekanligini aytishgan.

Dunyo bo‘ylab kompaniyalarning deyarli yarmi esa 2030-yilga kelib o‘z xodimlarini sun’iy intellektga almashtirmoqchi ekanligi ma’lum qilgan. SI ma’lum vazifalarni avtomatik bajara olishini hisobga olib ish beruvchi kompaniyalarning 41 foizi xodimlarni qisqartirish niyatida ekanligini ta’kidlagan.

Birinchi navbatda, yozma ishlar bilan shug‘ullanadigan xodimlar va buxgalterlarning ishlarini sun’iy intellekt egallaydi. So‘ngra, grafik dizaynerlar va huquqshunoslar ishi SI zimmasiga yuklanishi mumkin.

Dunyo bo‘ylab 70 foiz kompaniyalar neyron tarmoqlar hamda sun’iy intellekt yaratuvchi mutaxassislarni ishga qabul qilish fikrida ekanligini bildirgan. Hisobotda keltirilgan 62 foiz kompaniyalar, hech bo‘lmagandi SI bilan ishlashni biladigan kadrlarni ishga olish niyatidalar, deyiladi xabarda.