Jigarda yog‘ to‘planishiga olib kelishi mumkin bo‘lgan kasalliklar
Shvetsiya Karolinska instituti va Gyoteborg universiteti olimlari jigarning alkogolsiz yog‘ kasalligi diabetga olib kelishi, shuningdek, yurak va buyraklarga zarar yetkazishi mumkinligini aniqladi. Tadqiqot natijalari Nature Medicine jurnalida chop etildi.
Jigarning alkogolsiz yog‘ kasalligi - bu jigar hujayralarida yog‘ to‘planib, sirroz yoki saraton kabi jiddiy asoratlarni keltirib chiqaradigan kasallikdir. Kasallik ko‘pincha e’tibordan chetda qoladi, chunki dastlabki bosqichlarda sezilarli alomatlar bo‘lmaydi. Katta yoshdagi aholi orasida uning tarqalishi 25% ga yetadi. Asosiy xavf omillari semirish, ortiqcha vazn va metabolik kasalliklardir.
36 mingdan ortiq odam ishtirok etgan Britaniya biobank ma’lumotlariga asoslangan yangi tadqiqot turli xil xususiyatlarga ega bo‘lgan jigarning alkogolsiz yog‘ kasalligining ikki turini aniqladi. Birinchi tur asosan jigarning o‘ziga ta’sir qiladi, ammo kutilmaganda yurak-qon tomir kasalliklari xavfini kamaytiradi. Ikkinchi tur ko‘proq tajovuzkor: u nafaqat jigarga, balki buyraklarga shuningdek metabolizmga ham ta’sir qiladi, diabet rivojlanish xavfini oshiradi.
Bundan tashqari, olimlar jigarning alkogolsiz yog‘ kasalligining rivojlanishida rol o‘ynaydigan 27 ta yangi genni aniqladilar. Ushbu ma’lumotlar kasallikning har bir turi uchun ikkita aniq xavf ko‘rsatkichlarini ishlab chiqishga olib keldi, bu shifokorlarga tashxisni aniqroq baholashga va bemorning xususiyatlariga qarab eng yaxshi davolash usullarini tanlashga yordam beradi.
Olimlarning fikricha, ularning kashfiyoti jigarning alkogolsiz yog‘ kasalligi haqidagi tushunchani o‘zgartirishi mumkin. Endi tibbiyot mutaxassislari davolanishga individual yondashuvni: birinchi tur uchun - parhez va vazn yo‘qotishga urg‘u berish, ikkinchisi uchun - diabet yoki yurak yetishmovchiligi kabi birga keladigan kasalliklarni hisobga olgan holda kompleks terapiyani qo‘llashlari mumkin.
- 12 Dekabr, 08:55
-
Batafsil
