11:50 (10.04.2025)
250
Сунъий интеллект юрак хуружи хавфини 14 кун олдин аниқлади
Сунъий интеллект биринчи марта юрак хуружи натижасида тўсатдан юрак тўхташ хавфини 14 кун олдин башорат қилишни ўрганди.
Франция ва AҚШ олимлари томонидан ишлаб чиқилган янги алгоритм 240 мингдан ортиқ кунлик ЭКГ таҳлилларида 70 фоиздан ортиқ аниқликни кўрсатди. Натижалар European Heart Journal журналида чоп этилган.
Яратилган сунъий интеллект модели инсон миясининг ишлашига тақлид қилади ва хавфли аритмия - юракнинг ўлимга олиб келиши мумкин бўлган ритм бузилишидан олдин пайдо бўладиган заиф электр сигналларини топишга қодир.
"Биз 24 соатлик ЭКГ ёзуви орқали яқин икки ҳафта ичида хавфли аритмия юзага келиш эҳтимоли юқори бўлган беморларни олдиндан аниқлаш мумкинлигини аниқладик," - дейди тадқиқот муаллифларидан бири, кардиолог Лоран Фиорина.
Aлгоритм қоринчаларнинг электр стимуляцияси ва бўшашиш вақтини кузатиб боради - бу илгари мунтазам диагностикада қўлланилмаган асосий кўрсаткичдир. СИ синовларда 70 фоиз ҳолатда хавф гуруҳидаги беморларни, 99,9 фоиз ҳолатда хавфдан холи бўлган беморларни тўғри аниқлади.
Келажакда технология шифохона мониторлари, кўчма ЭКГ-рекордерлар ва ҳатто ақлли соатларга ўрнатилиши мумкин. Муаллифлар реал шароитларда моделнинг самарадорлигини тасдиқлаш учун клиник синовлар ўтказишни режалаштирмоқда.
