Жаҳон соғлиқни сақлаш ташкилоти баёнотида таъкидланишича, ҳар йили дунё бўйлаб 3,5 миллиондан ортиқ инсон қўрғошиндан заҳарланиш оқибатида вафот этади. Бу модда, айниқса, болалар саломатлиги учун жиддий хавф туғдиради.

ЖССТ маълумотларига кўра, қўрғошиндан заҳарланиш кенг тарқалган, аммо олдини олиш мумкин бўлган саломатлик учун хавф ҳисобланади. У ҳар йили жаҳонда 3,5 миллиондан ортиқ ўлим ҳолатига сабаб бўлиши тахмин қилинмоқда. Шунингдек, юз миллионлаб болалар қўрғошин таъсирига учраш хавфи остида.

Ташкилот халқаро ҳамжамиятни қўрғошиннинг инсон организмига таъсирини камайтириш ва унинг олдини олиш бўйича чораларни кучайтиришга чақирди.

Қўрғошиннинг инсон саломатлигига зарарли таъсири турли манбалар орқали юзага келиши мумкин. Улар қаторига бўёқлар, ошхона идишлари, косметика воситалари, зираворлар, чиқиндиларни ҳунармандчилик усулларида қайта ишлаш жараёнлари, саноат ифлосланиши ва бошқа манбалар киради.

ЖССТ таъкидлашича, қўрғошин таъсирининг хавфсиз даражаси мавжуд эмас. Ҳатто нисбатан кам миқдордаги қўрғошин ҳам инсон саломатлигига қайтариб бўлмайдиган зарар етказиши мумкин.

Сўнгги ўн йилликларда заҳарланишнинг олдини олиш борасида муайян ютуқларга эришилганига қарамай, дунёда мамлакатларининг ярмидан камроғи таркибида қўрғошин бўлган бўёқларни назорат қилиш бўйича қонунан мажбурий чораларни жорий этган.