Marburg gemorragik isitmasini oldini olish chora-tadbirlari ko`rilmoqda
Joriy yilning 29-sentyabr kuni Jahon sogʻliqni saqlash tashkiloti Afrika qitʼasidagi Ruanda davlatida Marburg gemorragik isitmasini qayd etgani sabab Oʻzbekistonda ham kasallikni oldini olish choralarini kuchaytirilmoqda. Bu haqda Sanitariya epidemiologiya qoʻmitasi xabar berdi.
Joriy yilning 28-sentyabr holatiga koʻra, Ruandaning 30 ta okrugining yettitasida, jami 26 ta tasdiqlangan kasallanish holati roʻyxatga olingan va shundan 6 ta holatda oʻlim qayd etilgan. JSST ushbu epidemiya xavfini milliy darajada juda yuqori, mintaqaviy darajada yuqori va butun dunyo darajasida past deb baholamoqda.
Marburg virusi isitmasini oldini olish va uning ehtiyot choralarini kuchaytirish maqsadida dunyoning koʻplab mamlakatlari bilan bir qatorda Oʻzbekiston Respublikasida ham davlat chegarasini kesib oʻtish joylarida faoliyat yuritayotgan Canitariya nazorat punktlarining (SNP) hushyorligi oshirilgan.
Marburg isitmasi bilan kasallanishni oldini olish maqsadida:
Gemorragik isitma kasalligiga gumon qilingan bemorlarni oʻz vaqtida aniqlab, izolyatorlarga alohidalash;
gumon qilingan bemorlar bilan muloqotda boʻlgan tibbiyot xodimlari tomonidan standart ehtiyot choralarini koʻrish, qoʻshimcha ravishda infeksiyani yuqtirishini oldini olishga qaratilgan shaxsiy himoya vositalaridan toʻliq foydalanish;
gumon qilingan bemorlarning qoniga tegmaslik, bemor ajratgan tana suyuqliklari, shuningdek, ular bilan ifloslangan yuzalar bilan muloqotda boʻlmaslik;
kasallikning etiologiyasi, klinikasi, laborator tashxisi va kasallikni oldini olish va profilaktikasi boʻyicha tibbiyot xodimlarining malakasini oshirish;
kasallikni nazorat qilishda xavfsiz ineksiya usullarini qoʻllash, shaxsiy himoya vositalaridan toʻgʻri foydalanish, qayta ishlatilayotgan tibbiy asboblarni zararsizlantirish va chiqindilarini xavfsiz yoʻq qilish;
infeksiya boʻyicha aholini xabardorligini oshirish maqsadida aholi orasida tushuntirish va targʻibot ishlarini amalga oshirish kabi choralari tizimli ravishda amalga oshirilmoqda.
“Shu oʻrinda fuqarolarimizga jiddiy xavotirga oʻrin yoʻqligini maʼlum qilamiz”, deyiladi xabarda.
- 9 Oktyabr, 11:47
-
Batafsil
