Нима учун бундай тартиб йўлга қўйилган?
Қариндошим онкологик касалликдан вафот этди. Уйда беморнинг рецепт асосида олган кучли таъсир қилувчи дори воситалари қолганди, буни поликлиника ходимлари келиб олиб кетди. Нима учун бундай тартиб йўлга қўйилган?
Компаниянинг @Doridarmon_aloqabot ига юртдошимиз томонидан шундай савол йўлланган.
Бу тартиб онкологик беморлар уйида вафот этгандан кейин қолган гиёҳвандлик воситаларидан нотўғри фойдаланишнинг олдини олиш мақсадида жорий этилган ва қонуний асосга эга.
Даволаш-профилактика муассасалари раҳбарлари вафот этган онкологик беморнинг қариндошлари томонидан топширилган фойдаланилмаган рецептлар, гиёҳвандлик воситалари қолдиқлари ва фойдаланилган гиёҳвандлик воситаларининг бўш ампулалари ҳисоби юритилишини ташкил этишлари зарур.
Даволаш-профилактика муассасаси бўйича буйруқ билан ҳисобдан чиқариш ва йўқ қилиш учун масъул бўлган шахсга фойдаланилмаган рецептлар, таркибида гиёҳвандлик воситалар бўлган дори-дармон препаратлари қолдиқларини, бўш ампулаларни қабул қилишни ташкил этиш вазифаси юкланади.
Мазкур ходим амбулатория картасига ёзилган навбатдаги рецепт олинган пайтдан бошлаб препарат сарфини таққослаши зарур. Топширилган рецептлар ва препаратлар сони, уларнинг номлари ва доривор шакли (ампула, таблетка, кукун) тартиб рақами қўйилган, ип ўтказиб тикилган, муассаса раҳбари томонидан имзоланган ва думалоқ муҳр билан тасдиқланган махсус журналда рўйхатдан ўтказилади.
Топширилган рецептлар ва доривор препаратлар йўқ қилингунга қадар сейфда ёки металл шкафларда сақланиши керак.
Асос
