ЖССТ чикунгуня вируси глобал пандемияси ҳақида огоҳлантирмоқда
Жаҳон соғлиқни сақлаш ташкилоти (ЖССТ) чивинлар тарқатадиган чикунгуня вирусли касаллигининг глобал эпидемияси тарқалишидан хавотирда.
Унинг белгилари юқори ҳарорат ва бўғимлардаги оғриқлар бўлиб, бу узоқ муддатли меҳнат қобилиятини йўқотишга олиб келади.
ЖССТ маълумотларига кўра, касаллик аллақачон 119 мамлакатда аниқланган, бу эса 5,6 миллиард кишини хавф остига қўймоқда. Ташкилот вакили Диана Рохас Алвареснинг айтишича, мамлакатлар олдиндан тайёргарлик кўришлари учун бугуноқ хавф сигналини бериш лозим.
Чикунгуня - бу чивинлар орқали юқадиган, тропик ва субтропик ҳудудларда кенг тарқалган вирусли инфекция. Касаллик юқори ҳарорат ва бўғимларда кучли оғриқни келтириб чиқаради, бу кўп беморларда бир неча ҳафтадан ойлаб давом этиши мумкин. Оғир кечиши камдан-кам учрайди, лекин айниқса кексалар ёки оғир касалликка чалинган одамларда кўпроқ кузатилади.
Ўлим даражаси бир фоиздан кам бўлса-да, миллионлаб ҳолатлар учун бу бир фоиз минглаб ўлимларни англатиши мумкинлигини ЖССТ огоҳлантирмоқда.
2004 ва 2005 йилларда Ҳинд океанидаги орол давлатларида юз берган йирик эпидемия ярим миллионга яқин одамнинг ҳаётига зомин бўлган эди. Бугун ЖССТ худди шундай манзарани кузатмоқда: вирус Ҳинд океанида, шунингдек, Мадагаскар, Сомали ва Кенияда, ҳамда Жанубий Осиёда тарқалмоқда.
Ҳинд океани оролларидаги эпидемия билан боғлиқ касалликнинг четдан киритилган ҳолатлари Европада ҳам қайд этилган. 2004 йилда бошланган эпидемия пайтида юқтиришнинг бундай усуллари аллақачон кузатилгани сабабли, ЖССТ бу воқеанинг такрорланишининг олдини олиш учун чоралар кўришга қатъий чақирмоқда.
Яқинда Роберт Кох институти Францияда, Франция-Германия чегарасига яқин жойда, чикунгуня касаллигининг янги ҳолати ҳақида маълум қилди. Бу ерда одам, чамаси, инфексияланган чивин чақиши натижасида бевосита касалликни юқтирган. Kronen Zeitung газетаси хабар беришича, у бу касалликни сафардан олиб келмаган.
