Оксфорд университетининг олимлари узоқдан тиббий маслаҳатлар ўтказишда нотўғри ташхис қўйиш ҳалокатли оқибатлар хавфи ортишига сабаб бўлиши ҳақида огоҳлантирмоқда.

Уларнинг Буюк Британияда 2020 ва 2023 йиллар оралиғида бир неча ўнлаб соғлиқни сақлаш ҳолатларини таҳлил қилиш асосида ўтказилган тадқиқоти беморларни парвариш қилишнинг ушбу форматида жиддий камчиликларни аниқлади.

BMJ порталидаги хабарга кўра, масофавий маслаҳатлашувлар нотўғри ташхис қўйиш ва натижада нотўғри даволанишни буюришга олиб келди. Ачинарлиси шундаки, ушбу ҳодисаларнинг баъзилари юрак-қон томир касалликлари, диабет ва саратон билан оғриган беморларнинг ўлимига олиб келган.

Хусусан, олимлар шифокорларнинг ўпка эмболияси ва сепсис каби оғир асоратларни ва ҳатто беморларнинг ўлимига олиб келиши мумкин бўлган оғир даражаларни аниқлаш қобилиятининг этарли эмаслигини таъкидладилар.

Масофавий тиббий маслаҳатлар, айниқса, ўзини изоляция қилиш зарур бўлган COVID-19 пандемияси даврида оммалашди. Бироқ, профессор Триша Гринхальх шифокорларнинг видеомулоқотдан фойдаланишдаги хатолари, асосан, ташкилий кескинлик ва алоқа самарадорлигининг етарли эмаслиги билан боғлиқлигини тушунтирди.

Мутахассислар, айниқса, тўғри ташхис қўйиш ва даволаш муҳим аҳамиятга эга бўлган жиддий касалликларга чалинган беморларга ғамхўрлик қилишда, телетиббиёт консультацияларидан фойдаланишда эҳтиёт бўлишга ва қайта кўриб чиқишга чақирмоқда.