8 йилдан сўнг 22,5 миллион киши Aльцгеймер касаллигига чалинади, Хитой эса касалланиш ҳолатлари бўйича етакчига айланади, бу эса жаҳон дори воситалари бозорида ушбу касалликка қарши дориларга талабни оширади.

GlobalData таҳлилий компанияси ҳисоб-китобларига кўра, Aльцгеймер касаллиги билан касалланишнинг умумий сони 2023-йилдан буён йилига 4,08 фоизга ўсиб бормоқда ва бу ўсиш суръати 2033-йилгача сақланиб қолади. AҚШ, Франция, Германия, Италия, Испания, Буюк Британия, Япония ва Хитойда беморлар сони 15,99 миллиондан 22,51 миллионгача кўпаяди. Прогнозларга кўра, энг кўп касалланиш ҳолатлари Хитойда қайд этилади: 2033-йилга бориб бу ерда 10,4 миллион ҳолат қайд этилиши кутилмоқда. Энг кам беморлар сони эса Испанияда бўлади ‒ 0,62 млн киши.

GlobalData компанияси ходими Aнтара Бхаттачарянинг сўзларига кўра, 2023-йилда аёллар эркакларга қараганда кўпроқ Aльцгеймердан азият чеккан. Таҳлиллар шуни кўрсатадики, 2023-йилда Aльцгеймер билан касалланганларнинг 79 фоизини 75 ва ундан катта ёшдаги одамлар ташкил этган. Қарийб 21 фоизи 65 ёшдан 74 ёшгача бўлганлар зиммасига тўғри келади. Рўйхатга олинган 15,99 миллион ҳолатнинг тахминан 55 фоизи енгил шаклда.

Aльцгеймер касаллиги ‒ когнитив ва хулқ-атвор бузилишлари билан тавсифланган прогрессив нейродегенератив касаллик. Касалликнинг аниқ сабаби тўлиқ ўрганилмаган бўлса-да, олимларнинг фикрича, аксарият ҳолларда касаллик генетик, турмуш тарзи ва вақт ўтиши билан мияга таъсир қиладиган экологик омилларнинг комбинацияси туфайли юзага келади. Сўнгги йилларда ўтказилган тадқиқотлар ва клиник синовлар шуни кўрсатадики, касаллик этиологиясини аниқлашда иккита оқсил бета-амилоид ва тау-оқсил энг муҳим рол ўйнайди.

Шу билан бирга, Aльцгеймер энг кўп харажат талаб қиладиган касалликлардан биридир. Ҳозирда даволаш асосан касалликнинг ривожланишини секинлаштиришга ва аломатларни енгиллаштиришга қаратилган. Тўлиқ даволаш усуллари ҳали мавжуд эмас.

Aльцгеймер билан оғриган беморлар сонининг кўпайиши фармацевтика компанияларини ҳам бу касалликка қарши дорилар ишлаб чиқаришга ундамоқдади. Ҳозирда Eli Lilli компаниясининг Donanemab препарати энг самарали бўлиб турибди, бу препарат 2025 йилда тасдиқланиши ва бозорга чиқарилиши кутилмоқда.