Rossiya Davlat Dumasi darhol ikkinchi va uchinchi oʼqishda tibbiy maqsadlarda foydalanish uchun moʼljallangan dori vositalari roʼyxatiga olingan dori vositalarini retseptsiz sotganlik uchun jarima miqdorini oshirish toʼgʼrisidagi qonun loyihasini maʼqulladi. Bu bilan psixofaol dori vositalarini shifokor retseptisiz isteʼmol qilishning oldini olish maqsad qilingan.

Hozirda mansabdor shaxslar retsept asosida beriladigan dori vositalarini retseptsiz sotganlik uchun 5 ming rubldan 10 ming rublgacha, yuridik shaxslar uchun — 20 ming rubldan 30 ming rublgacha jarimalar nazarda tutilgan. Bunday qoidabuzarliklar uchun farmatsevtlarga 1,5 mingdan 3 ming rublgacha pul jazosi qoʼllaniladi. Rossiya Federatsiyasining Maʼmuriy javobgarlik toʼgʼrisidagi kodeksiga tegishli oʼzgartirishlar kiritilgandan soʼng, farmatsevtlar 10 mingdan 20 ming rublgacha jarima toʼlashlari kerak. Shuningdek, ular olti oydan bir yilgacha muddatga diskvalifikatsiya qilinishi mumkin.

Аgar roʼyxatga olingan dori vositalarini sotishda jinoiy huquqbuzarlik belgilari boʼlmasa, dorixona xodimlari jarimaga tortiladi. Yakka tartibdagi tadbirkorlar uchun sanktsiya 50 mingdan 100 ming rublgacha, yuridik shaxslar uchun — 150 mingdan 200 ming rublgacha boʼlgan miqdorda belgilanadi.