Dunyoda semizlikdan aziyat chekayotganlar soni 1 milliarddan oshdi
Ularning 879 millioni kattalar va 159 millioni bolalar ekani taʼkidlanmoqda.
1990 yildan 2022 yilgacha butun dunyo boʼylab semizlikdan aziyat chekayotgan odamlar soni sezilarli darajada oshdi. Bu haqda Forbes nashri The Lancet tibbiyot jurnalida chop etilgan xalqaro olimlar guruhi tadqiqoti natijalariga tayanib xabar berdi.
Tadqiqotchilarning fikriga koʼra, 1990 yildan 2022 yilgacha yoshi katta ayollar oʼrtasida semirishning global darajasi ikki baravar, yoshi katta erkaklar orasida uch baravar, bolalar orasida esa toʼrt baravar koʼpaygan.
Semiz ayollarning eng koʼp soni Tonga va Аmerika Samoasida, eng koʼp semiz erkaklar soni esa Nauruda, shuningdek, aholining 60 foizidan ortigʼi kasallikdan aziyat chekadigan Аmerika Samoasida qayd etilgan. Bolalarda semirishning eng yuqori darajasi Niue va Kuk orollarida kuzatilgan – voyaga yetmaganlarning 30 foizi.
Tadqiqotchilar maʼlumotlariga koʼra, Qoʼshma Shtatlardagi ayollar oʼrtasida semirish darajasi ikki baravar koʼpaygan - 1990 yildagi 21,2 foizdan 2022 yilda 43,8 foizgacha. Erkaklar oʼrtasidagi koʼrsatkich bir vaqtning oʼzida 1990 yildagi 16,9 foizdan 2022 yilda 41,6 foizga oʼsgan. Shunday qilib, ekspertlarning taʼkidlashicha, Qoʼshma Shtatlar ayollar orasida semirishning eng yuqori koʼrsatkichlari boʼyicha 36-oʼrinda va erkaklarda semirish darajasi boʼyicha 10-oʼrinda turadi. Buyuk Britaniya ayollarning semirishi boʼyicha 87-oʼrinni va erkaklarning semirishi boʼyicha 55-oʼrinni, Xitoy esa mos ravishda 11 va 52-oʼrinlarni egalladi.
Umuman olganda, bugungi kunda dunyo boʼylab 1 milliard odam semizlikdan aziyat chekmoqda, ularning 879 millioni kattalar va 159 millioni bolalardir. Tadqiqotchilar oʼz hisobotida taʼkidlaganidek, ortiqcha vazn yoki semirib ketish yuqori qon bosimi, II turdagi diabet, insult, yuqori xolesterin, ayrim saraton turlari, yurak-qon tomir kasalliklari, uyqusizlik, oshqozon-ichak kasalliklari va ruhiy salomatlik, shu jumladan depressiya va tashvish muammolari xavfini oshiradi.
