Инсулин инъекцияларининг ўрнини босувчи самарали восита ишлаб чиқилди
Чжэцзян университети олимлари диабетни даволашни тубдан ўзгартириши мумкин бўлган технологияни тақдим этдилар: улар инсулинни тери орқали крем ёрдамида етказишга муваффақ бўлдилар.
Nature журналида чоп этилган тадқиқотга кўра, махсус OP-I полимери инсулин молекулаларини тери тўсиғидан ўтказа олди — бу аввал молекулаларнинг катта ўлчами ва гидрофил хусусиятлари сабаб деярли имконсиз деб ҳисобланар эди.
Тадқиқот гуруҳи кремни инсон тери моделларида синаб кўрди. Натижалар одатий инъекцияларга яқин бўлди: глюкоза даражаси 1-2 соат ичида нормал ҳолатга қайтди ва 12 соатгача барқарор ҳолатда сақланди.
Полимер тери pH даражасига қараб зарядини ўзгартиради: тери юза қисмида липидларга «ёпишади», чуқурроқ қатламларда эса зарядини йўқотиб, инсулинни организм ичига олиб ўтади. Танага киргандан сўнг комплекс гормонни жигар, ёғ ва мушак тўқималарига босқичма-босқич ажратиб боради, бу эса яллиғланиш белгиларисиз юмшоқ ва узоқ таъсирни таъминлайди.
Муаллифлар таъкидлашича, технология нафақат инсулин, балки бошқа оқсил ва нуклеин препаратларини етказиб бериш учун ҳам мос келиши мумкин. Клиник қўлланишгача ҳали вақт борлигига қарамай, ушбу натижалар диабетни «инъекциясиз» даволашга энг ишончли қадамлардан бири сифатида баҳоланмоқда.
- 25 Ноябрь, 17:30
-
Батафсил
