Toshkent shahri va viloyatida salkam 20 ming dona narkotik modda aniqlandi
Kuchli taʼsir qiluvchi dori vositalarining noqonuniy savdosiga qarshi kurashish doirasida Davlat xavfsizlik xizmati xodimlari tomonidan ichki ishlar va bojxona organlari xodimlari bilan hamkorlikda tezkor tadbirlar oʼtkazildi, deb xabar berdi DXX matbuot xizmati.
Keltirilishicha, Toshkent viloyati Ohangaron tumanida joylashgan «Chinor» YPX maskanida Cobalt toʼxtatilib, tekshirilgan. Natijada haydovchi — Fargʼona viloyati Oltiariq tumanida yashovchi, 1989 yilda tugʼilgan shaxs va unda yoʼlovchi sifatida ketayotgan, Fargʼona tumanida istiqomat qiluvchi, 1986 yilda tugʼilgan fuqaro 10 864 dona «Regapen» hamda 1995 dona «Tropikamid» kuchli taʼsir qiluvchi dorilarini Toshkent shahriga olib ketayotgani maʼlum boʼldi.
Tezkor tadbir davom ettirilib, Sergeli tumanida bu dori vositalarini qabul qilib olgan vaqtlarida Yashnobod tumanida yashovchi, 1988 yilda tugʼilgan, muqaddam sudlangan ayol va Uchtepa tumanida istiqomat qiluvchi, 1990 yilda tugʼilgan fuqaro ushlandi.
Yana bir holatda Toshkent halqa avtomobilь yoʼlining Bektemir tumani hududidan oʼtgan qismida toʼxtab turgan Cobalt koʼzdan kechirilganda uning salonida boʼlgan, Fargʼona tumanida yashovchi, 1996 yilda tugʼilgan ikki fuqaro 5450 dona «Regapen» va 466 dona «Tropikamid» kuchli taʼsir qiluvchi dori vositalarini Fargʼona viloyatidan Toshkent shahriga olib kelgani maʼlum boʼlib, ushbu dori vositalari protsessual tartibda rasmiylashtirib olindi.
Yana bir holatda Namangan-Toshkent yoʼnalishida harakatlanayotgan Cobalt poytaxtga kiraverishdagi «Sharq» YPX maskanida toʼxtatilib tekshirildi. Natijada unda yoʼlovchi sifatida ketayotgan, Uchqoʼrgʼon tumanida yashovchi, 1980 yilda tugʼilgan ayolga tegishli sumkada 590 dona «Selofen» va 478 dona «Tropikamid» kuchli taʼsir qiluvchi dori vositalari borligi aniqlandi.
Surishtiruv harakatlari davomida u dori vositalarini Toshkent shahrida kutib turgan, 1991 va 1997 yillarda Jizzax viloyatida tugʼilgan ikki fuqaroga olib borib berishi kerakligi maʼlum boʼlib, Sergeli tumanida ushbu shaxslar ham dori vositalarini qabul qilib olgan vaqtlarida ashyoviy dalillar bilan ushlandi.
Shuningdek, Chilonzor tumanidagi mehmonxonaning ular vaqtincha joylashgan xonasidan 137 dona «Selofen» va 11 dona «Tropikamid» kuchli taʼsir qiluvchi dori vositalari protsessual tartibda rasmiylashtirib olindi.
Barcha kuchli taʼsir qiluvchi dori vositalari Qirgʼizistondan noqonuniy yoʼllar bilan olib kelingani maʼlum boʼldi. Hozirda holatlar yuzasidan ushbu shaxslarga nisbatan Jinoyat kodeksining tegishli moddalari bilan jinoyat ishlari qoʼzgʼatilib, tergov harakatlari olib borilmoqda.
- 2 February, 11:20
-
Read more
